11‏/04‏/2010

الأكثر رعبا في عالم الكرتون




في هاللحظات المتأخرة من الليل .. اطلقت لذاكرتي العنان .. للكتابة عما يحضرني .. من شخصيات كرتونية .. اتسمت بالخبث والدهاء والشر  والكراهية والحقد  .. واكثر اللقطات الكرتونية  رعباً او شراً في حياتي  ... ولأقف  وبعد كل هذه السنين وقفة تنديد وتشجّب
فسامحوني ... على قسوتي على هذه الوحووش


" فعنصر المفاجأة  "
ستلاحظون ..ان بعضها .. ليس بالمرعب .. ولكنك لم تتوقع ان يصدر هذ االفعل منه .. فتفاجأ به
.. فهذا شي مريب

واحيانا .. تركيبة الشخصية الخلقية .. فهذه ذات اعين زرقاء وذات ابتسامه ميّتة وذاك رأس بلا جسد ..
واحيانا اخرى .. الدور الذي تلعبه الشخصية   .. فهذا يريد ان ينتقم .. وتلك تريد ان تقتل

فمهما .. تعددت الاسباب .. واختلفت العقليات .. هذه قائمة باكثر شخصيات الكرتون رعباً في حياة مستر مطوع
وحياة الكثيرين من امثالي.



العد التنازلي


-18-
غبراء

إللي في مسلسل جزيرة النظافة << مب متأكد من العنوان



المهم ..هاي إللي ادوّر المرجان حق شبابها ... كانت شوي قاسيه .. فجرحت مشاعري
=)




-17-
الدبابير
مسلسل سوار العسل



غربلهم الله .. لا يرحمون ولا يخلّون رحمة الله تنزل<< استغفر الله هالرمسة غلط
فمحـّد يقدر يمنع رحمة الله من نزولها
اوكيه ......؟ يلا نكمّل

ما ادري .. ليش يتني عقدة من هالدبابير .. حد يقدر يذكرني ..؟


-16-
الدينصورات
في مسلسل الرجل الحديدي


مادري من شو مصنوعات .. ويسببن دمار للبشر وإللي يخوفني اكثر عيونهن
وأظن
 اللقطة .. اول ما يطلعن .. ومع التأثيرات الموسيقية .. يرتفع الأدرينالين .. حدّه



-15-
جد لينا

مسلسل عدنان ولينا

للحين مادري اسمه بدر أو رامي
بس اظن رامي

هو إللي يطلع اول شي .. شرير وقاسي .. ويوم شاف لينا وعدنان قعد يهلكهم بالشغل عالسفينة
وكلّـه ساكت
ولينا كانت شاكّه إنه جدها .. وبعدين استوت السالفة ..إنه قامت تتخاطب معاه بلغة الطيور مادري الحيتان المهم في شي مو طبيعي في الموضوع
وعقب اسوى طيّب .. معاهم .. بس عقب شو .. عقب ما سوّا باد أمبرشن حق عمره ..!!


-14-
سكار
 أسد الملك



شخصية حبيتها بصراحة طوال الرسوم ولكن إللي ارعبني صدق
قتله لموفاسا بهالطريقة
بس كان اسلوبه .. جداً جميل  ومحترم كوحش
وعقولة الضباع المخبّل:
صحيح اسد .. بس اخلاااااااق
^_^



-13-
شان يو
فيلم مولان -1


من اروووووووووووووع افلام ديزني .. ومحبووك صح وجميل للغاية
فلابد لديزني .انها تحط .. شخصية رعب ما حصلتش  وفي نفس الوقت " واقعية " .. فكانت شخصية شان يو

يوم  يأمر بقتل الناس .. و جتل قرية ما ترك غير دمية بنت صغيرة .. واستخدمها لإيجاد جيش الأمبراطور
وحش وحش وحش

مرعب .. واعطيه شعار ارعب مرعبي ديزني



***
نصل لمرحلة الجد عاد

كل شخصية من الشخصيات التالية

سببت لي عقدة فحياتي ... والله لا اكذب عليكم ..إذا قلت انني

حلمت بهم سنين .. و بعضهم اصابتني بسببهم الحمى

من الرعب ...! فقط

فوجب التحذير ... وخاصة من  الصور



 


-12-
الساحرات الثلاث في فيلم
هرقل

المسلسل هذا كله كفر .. وديزني حاولت أدبلجه للـ " حلال " بأي طريقة .. واذكر ايامها .. امي كسرت الشريط عسبّت البوسه إللي فيه
<<
هي لو فهمت قصة الفيلم .. جان كسرت ظهورنا بالشريط
=)


كان الجانب المظلم في هالفيلم .. واضح جداً .. و ملفت للنظر .. فملك الموت هيسوس
وبحر الأرواح و  الأشباح و ملائكة العذاب .. يدفع للريبة

وكله كوم وهالساحرات كوم تاااني

مالهن غير عين وحده يتبادلنّـها
واللقطة إللي تخوّف يوم يقطعن خيط  " روح "  إنسان .. اونّه خلاص دنى اجله

  وكان اييني اختناق عند النوم .. يوم افكّر إنهن الحين ماسكات خيطي
" روحي"
خرّبوا عقيدتنا ..



-11-
الرجل الحديدي
من
الرجل الحديدي

انا اوّل مرة .. اشوف اقوى الأبطال .. هو إللي يخوّف .... ذا مووست

الرجل الحديدي .. يوم يتحدون لميس وكمال ..

وتبدا طاقتهم بالنفاذ بعد 3 دقايق وشوي .. ونحن في ترقّب ..هل بيجتلون الدينصور ولاّ لا .. ؟

( هو أكيد بيموت.. بس عاد صغار وقاصيين علينا )

المهم .. يوم ينقز كمال ورى كرسيه عند هذيج الدروازة الملونة إللي
 ناقزه فيها اخته قبل .. ويتحدون .. يطلع مادري من وين .. ريّال قبييح عيونه صفر
ما تتحرّك براطمه ...عاد  انا اوّل ما شفته .. انصرعت
ومن عقبها ..تمنيت حد يجتله .. و درت ويّـا صف الداينصورات المسكينه
( خاصة حلقة هذي أم البيض .. يحليلها )

هذا البطل جيه .. عيل كيف الوحش ...^^؟



لمشاهدة التوب تن

اقفز هــنا

 

-10-
الأميرة العجوز
مسلسل السندباد


هو في الحقيقة .. في اكثر من شخصية مخيفة في السندباد .. و اكثرهم رعباً .. إذا تحيدون الشيبة الأزرق الضعيف إللي لقوه في الصحراء وعطشان وبعدين ركب فوق السندباد علشان يوديه الواحة و يوم شاف السندباد إنعكاس صورته لقى راس حمار ...!!1

انا هنيه مت... وحييت مرة ثانية من الرعب

واللقطة الثانية .. كانت تتكرر وهي العيوز هذه إللي في الصورة . كانت تستميل الرجال .. و وتسحرهم .. وتخليهم يخدمونها وعقب اظني تجتلهم .. شي جيه المهم ..إنها خبيثة و تتحوّل .. و ظلّها .. مخيـــــــــــف




-9-
الساحرة
الأميرة النائمة


ما بقول غير . .لقطت يوم تبى تغيرها بالتفاحة وهيه عيوز
 رسخت في ذهني
- ! -




-8-
الإمبراطور قروس
- مسلسل المويض الأزرق -



تذكرون رسوم كاكيرو ... إللي يدّور ابوه .. بعد ما اختططفه .. هذا الإمبراطور جروس .. لأنه ابوه كان كاتب .. وكتب شي من اسرار الإمبراطور .. آخر شي طلع ابوه هو نفسه الإمبراطور قروس ...!
كنت... صدق اخاف من ابوه .... خاصة .. يوم يأمر بأن يقتل اهل القرية او البلدة .. بلى شفقة
( جد خاطري احمّله .. واشوفه كلّـه من يديد )




-7-
سمـــر
مسلسل سهم الفضاء



هاي  زراعة احد ابطال فريق سهم الفضاء المكوك إللي سار يدوّر على حنان إلل كان يحشرنا فيها سيف " خطيبته" المخطوفة
وسمر.. بنت او صبارّة طيبة وحبوبة .. ف كل السمسل .. و صوته داااااافي وتصّيح من الرقه والحنان

ولكن في حلقة من الحلقات .. تخبّلت .. بفعل دوا مادري جهاز .. خلاها .. مينونه .. وقامت تهلوس .. "تجلّبت" عيونها
وكانت تضحك بلا .. سبب .. وامبونها بتجتل
" kill"
بدر .. اقرب اصقائها في الرحله

اذكر .. حزتها .يالسين .. منسدحين على بطوناّ وحاطن أيادينا عالمخدة
ويوم بدا هالمشهد ...كل واحد بدا إييلس صح ... ويرجع للورى .. شوي شوي .. ألين وصلنا نص الصالة
وكل واحد " جاب ركبه "  يعني يالس يلست ترّقب .. او بلأحرى
" زيااااااغ "

!
فنفس الليلة .. انا وخويه .. ما قدرنا نرقد .. ابداً .. واخويه اصبح مريض ... من الخوف
^_^"



-6-
لعبة العنكبوت بو راس
فيلم حكاية لعبة 1



اللقطة يوم احبس بز يطير بسبب وودي في غرفة سد ولد جيران آندي الطيب
وكان هذا سد .. يسوّي تجارب على الدمى و " يفرئعها " ويستانس
فمن إحدى تجاربه الفاشلة هاللعبة .. المخيفة .. و اوّل ما شافها وودي .. وهو حاط عليه البجلي " المصباح "  على راسه وعقب طلع و بان جسمه

رررررررررررررررررررعب مخيف
وغريبة على ديزني ... ! الوحشية هاي



-5-
تامبا
مسلسل الوميض الأزرق


صديق ككيرو المفضل بعد " بلينك" الحصان

وراعي الباص اللي حشى ما صار باس .. يطير ويتكسر فكل حلقة



المهم ... هالرسوم اصلاً.. إللي سواه واحد متخبّل عالرعب

في حلقات وايده رعب فرعب .. و لكن إللي صدق صدق .. كدت ان اموت .. بسببها

هي هذيج الحقلة .. يوم كانوا في بحر الكوابيس
يوم وصلوا مدينة الظلام  مادري الضباب

إللي اي واحد يدخله .. يحلم بكل شي يخاف منه

فكاكيرو حلم .. إنه كان سبب في حادث اليم .. تسبب في مقتل هالدريول " تامبا " فالمشهد .. الحين

صدق .. كاكيرو يمشي بعد الحادث  من مؤخرة الباص .. إلى المقدمة .. ليطمئن على تامبا .. و تقدرون تلاحظون .. إيد تاميا على السكان " المقود"  .. عظام بس...! وكاكيرو مب منتبه .. ألين ما وصل جنبه وحط إيده على الدريول .. ليطمأن على حاله .. فإذا بتامبا .. يتحول إلى هيكل عظمي .. بملابسه .. ويقول لكايرو قتلتني ..

ءءءءءءءءءءء

وكاكيرو يصرخ من الرعب .. ويركض في ذاك الباص إللي ما طاع يخلّص ...

ويطووووووول الباص


لقطة اظن انها لو عرضت في هالعصر .. بتقوم عليها الدنيا و ما بتقعد إلا يوم تتسكّر هالقناة ..






-4-
البارونة مودلين
مسلسل ليدي




الشريرة إللي تبا تتزوج جورج  ابو لينا وسارة .. غصب طيب
كله رمستها .. جوووورج  جووووورج  وابي ابي
وضحكتها إللي تتجلجل في انحاء القصر .. صدق كنت اخاف منها
كّله بسبت . يوم فنّشت هذيج الخدامة الطيبّة .. ويوم حبست ليدي في الأسطبل و العليّة
عاد لا تخلّوني اييب طاري عايلتها .. استغفر الله ..
( انا اوّل مرة اشوف عايلة كلها .. شر خبث .. حتى قطوتهم ..! )
"


-3-
الباردة
- مسلسل وادي الأمان -



لا دماء ولا افعال قذرة ولا شي ..

من اتفه الشخصيات التي رأيتها في حياتي .. فلا تتكلم .. ولا تفعل شي .. سوى المشي .. واخراج صوت مخيف من فمها

ءءءءءءءءءءءءءءءءءء

باختصار .. صعقت عندما رأيتها ..

وحلمت بها كثيراً

اتذكر ..إنها كانت تبى شنطة شو سالفتها.. مادري ..؟

ويوم شفت فلم سبريتدت أوي الخطييييييييييير
تذكرتها  لأنها نفس الأستايل
المقيت .. !



-2-
ؤلولو
الرجل الحديدي



عند رقم
قلت لكم الرجل الحديدي .. كان يخوفني البطل
فكيف بالشرير ...!

آلولو .. هذا الدينصور المسؤول بإرسال باقي الدينصورات غلى كوكب الأرض .. كل لقطاته ..تحت الأرض .. و يطلعن عيونه الحمر.. ويهزّ راسه .. و
صووته إللي يخوّف .. ويعلق في الذهن
"   سننتصررررر ... سننتصررررر "

ويرواوونا كيف ينقهر .. ويحترق قلبه  بعد كل معركة يفوزون فيها .. لميس وكمال .. يعني يختمون المسلسل .. بشيفته
" ختامها مسك "
وتعالي ياااا احلاااااااااااااااااااااام
=")

هالشخصية ... تصدرت قائمة المرعبين في عائلتنا كلها
ولكن ليست قائمة ... جميع الأطفال






- 1 -
آنسة منشن
مسلسل سالي



ماذا تريدون مني ان اقول !... فقد إنتهى عند هذه الشريرة .. القول .. فكل ما كتبته عن الشخصيات التي سبقتها.. من رعب وبشاعة .. فهو يعتبر مدحاً .. بالنسبة لما فعلته هذه المرعبة بالأميرة سالي ..

ابشع و اشرّ و اخوف .. واقسى شخصية كرتونية عرفها التاريخ .. وبلا منازع

منشن

 مديرة المدرسة الداخلية للبنات و اختها نائبتها ..إللي اطيب منها بمليون مرّة .. .. فهالوحشة في البدايه كانت تعامل سالي بكل موده و طيبه لأن ابوها ملياردير .. وتاجر الماس ..فدلعتها احلى دلع .. وخسّرت عليها ومصاريف .. و لكن عقب ما مات والد سالي و اشهر افلاسه

انصدمت .. منشن .. ووبدا مسلسل إستعباد سالي

<<
 إنزين سالي شولها خص فموت أبوها ... !!!!

لن انسى تقطب حاجبيها ما حييت

="(

بجد .. آنسة منشن ... دمّرت حياة الكثيرين .. وتصدّرت قائمة المرعبين في عالمي الطفولي .. ومعها اختم  لكم هذه الرحلة والتي اتمنى

 ان تكونوا استعدّتم بعض الذكريات التي لا تـُنسى من موروثنا الحضاري عن
عالم الرسوم المتحرّكة


^_________________^


الكتابة خذت نص ساعة بالروب =) .. والصور خذت مني 3 ايام
" وات أويست "

40 حـط تـعلـيـق:

Awoosha يقول...

السلام عليكم
لا ما شاء الله الروب ياب نتيجة ^^

بس صج ما في على الآنسة منشن في الرعب
وحتى البارونة أرعبتني ..

أما فلم بز أغلب الاختراعات الفاشلة مخيفة بصراحة
ونفس الحال مع السندباد

وإذا تذكر رسوم رعد العملاق
في حلقة أييهم كائن فضائي أو مادري شنو ولونه وردي هلامي كأنه جلي ويطلع أصوات مخيييفة
هذي صج خفت منه أياااام

ومنها وقفت أتابع هالرسوم

يعطيك العافية أخوي
أعدت ذاكرتنا لهالعالم الخيالي
=)

حاولت أنسى يقول...

أولـى نتائج الروب..ياعيني علــيه

كل الشخصيات صووب..وصاحبنا شان يو ف صوب

الى اليوم والله اني اخاف منه يوم اشوفه

حركت ذكرياتي مستر ..خاطري اشوف الرسووم

شرايك تحمله لنا!

غير معرف يقول...

Wow!
i have been there! i saw those! I felt the same!

wondering! have you seen Howel's moving castle??
just wondering!
blue

Rofaidah يقول...

،


ههههه يالله
من عذرك والله تخاف منهم
انا بعد اغلبيتهم اكرررههم
وخاصتن منشن :D
صرت احس اي احد شرير بالدنيا يشبهها
انا ما انسى حركة يدها يوم تضغط عليهم بقوه لم يصير شي ما يعجبها :S
<< من عشاق سالي حتى الان :P

عجبني واجد هذا الشي
يعطيك العافية ،

ري ري يقول...

بصراحة كل الموضوووع كوووم ..

و حقت وادي الامان كوووم ثااني لوحده ..

انا الين اليوم أكره وادي الامان و مدري كيف سموه وادي امان و هو كله رععععععب ..

عموما الموضوع مرررة رهيب و رجعنا ذكريات حلوة ..

الله يعطيك العافية مستر ..

مستر مطوع يقول...

عواشي ......... شفتي عاد . ظلموا الروب :)

وفي شخصيات وايد ذكرتها عقب ا كتبت الموضوع .. وما تشجعت احطها ني مالقيت صورها .. ومنه إللي ذكرتي في الرعد العملاق .. وبعد الشجعان الثلاثة يوم ياهم هذاك أظن اسمه جيجي .. الأصفر .. بعد رعب ..و الوحش إللي في غناديايزر إللي نصه حرمه ونصه ريال .. = )

حاولت أنسى .... شرايج .. تسيرين صفّج وورشتج وتخلّصين شغل .. ( حشى ما استوى منتدى! خخخ ) =")


بلو ... هيه شفته وعيبنيه وايد ( البطلة تتحوّل عيوز ) .. تحسين في الموضوع .. هدووء وسلام وشي غرييب

روفيدة ... بالضبط .. ومرات لما تمسك بجلابيتها الزرقى بقبضة إيدها وتشد عليها ... =""")

ريري .. خخخ إلا وادي الرعب

kobi يقول...

اختيار صائب للأشرار ،،

حسبي الله عليهم ،،

بس ..

الرجل الحديدي بريء جدا ،، ههه

بس فيه واحد وحش في الرجل الحديدي راسه زي نصف دائرة ،،

هذا أموت منه رعب ،،

و في شيء نسيته ،،

(العلية ) ^^

كانت تخوفني أكثر من البارونة حسبي الله عليها خطافة الرجالة ،،

و فيه كمان شيشا اللي في مايا ،،

و الوحوش اللي في غرندايز على راسهم هذاك اللي ينفتح وجهه يمممممممممممممممممممممممماااااااا

و إذا تذكرت شيء بجي بكتبه ،،

مشكووور

مستر مطوع يقول...

كوبي .. خخخخخخخخ

خطافة الرجالة =)

ذكرتيني .. بشيشا .. والله صدقج .. الله يسقمها من حرمة

مريم =) يقول...

الله على ذيك الأيام !

من جِد ذكريات مخيفة خصوصًا الوميض الأزرق ومدينة الأمان كنت أخاف من المسلسل بكبره !

أما حلقة سندباد اللي ركب فوق ظهره هذاك الشخص ، فشفتها وأنا كبيرة وارتعت !


شكرًا مستر

=)

Meera Al Blooshe يقول...

اللي صدقت فيه .. مال الشيبة اللي بيظهر فسندباد .. هذا أنا اعتبره الى يومك هذا كابوس بالنسبة لي .. حتى ولو يلست ويا خواني اتذكر حلقات سندباد ايلس اذكرهم بهالحلقة =/

وشسمه هالشخصية اللي تظهر في رسوم سبريتد أوي هاي بعد تزيغ ,, واتخيلهم أحيانا =.="

أما باقي اللي ذكرتهم ما كانوا يسببون لي كوابيس ,, بالعكس كانوا يقهرون بي وكنت أتخيل نفسي أقاتلهم مثل الآنسة منشن ..

وشخصية زوجة الاب في سنوايت يوم تتحول الى عيوز =.=" يا ربااه من شكلها ,, مادري ليش اتخيل شكل الجنيات بهالشكل خخخخ

وبالمناسبة إذا الروب يعمل عمايله ,, استمر بلبسه عشان تطلع ابداعاتك ^^

غير معرف يقول...

هيه صدق كانوا واااايد أشرار !! ما احبهم وخاصة جد لينا وىنسة منشن والبارونة مودلين كلياتهن !!

أندلسية يقول...

بصراحة ماأذكر أني كنت أتأثر وايد بشخصيات الرسوم المتحركة يعني ما أقدر أحط قائمة بأكثر شخصيات كرهتها أو حبيتها<< هل هذه حالة طبيعية؟؟

لكن شيبة السندباد أذكره و صدق صدق خوفني من الخاطر و أرعبني مع أني ما كنت صغيره وايد لما شفته ×_×

غير معرف يقول...

والله موضوعك توووحفه
يااني ضحكت ضحك
صرااحه اكثر شخصيه ترعبني اللعبه اووم رااس للحين لين شفتها تجيني اوم الركب
اما عمو سكاار يالبى قلبه ياشيخ هذي الناس الرزه
عكس المهبل اللي معه<<الضبااع
عموما يالغالي مانطول عليك
وتسلم والله
مانحرمشي من متل هالموازيع

SCRIBBLE ..♥ يقول...

والله قووي الروب ! طلع مب هين ^^"

خخخخخخخخخخخخخخخخخخخخخخخ

والله الموضوع بكبره توووحفـــه

ماشاءالله عليك الرسوم كلهـا حاضرهـا


شكرا على البوست الممتع : )

غير معرف يقول...

from where you bought THAT robe.....? really :)

غير معرف يقول...

هههههههههههههههههه صدق صدق هلكتني من الضحك

بس ولله الحمد نصهن مالحقت عليهن واللي وحليلها منشن

مب لها الدرجة من الرعب هههه

بصراحه ما احيدني فيوم تأثرت لها الدرجة من رسوم صح كنت مدمنه بس مب لها الدرجة ههه

انا شكلي بسير اشتريلي روب عيبني السالفه دام جي بيظهر من وراه ههههه

غير معرف يقول...

مرحبا مسر مطوع
تسلم عالمجهود الطيب...بصراحه شغل متعوب عليه خاصة الصور كيف حصليتهم مادري..!!

هذا الكائن الغريب الي فوادي الامان كان كابوس بالنسبالي خااااصة يوم اتييني الحمة..ههههههه ليش مادري.!!!

يلا تسلم ذكرتنا بأيام التسديح تحت التلفزيون لساعااااات ونحن فاجين حلوجنا نصدق ههههههههههه


arch

تونا جاوية بالنكهة اليابانية يقول...

ههههه والله انبسطت على ذي التدوينة :)

الرجل الحديد بااين علاقات مرعبة كتييير معاه من البطل للشرير آلولو خخخخخ
أما ديك الحلقة اللي تجمع فيها البيض ذكرياااات منجد يحليلها ^ــ^

آنسية منشن والشريرة أوم شعر أحمر في ليدي نفسي اقتلهم :@

بظ يطير ابداااااع بلا حدود كل الشخصيات فيه ظريفة في غرابتها

أما سكاااار والضباااع فدولا أفضل شخصيات ديزني صراحة وعلى قولك أسد بس أخلاااااق هههههههههههههه

ومعظم ما ذكرتهم هنا لم يسبق لي معرفتهم ^^


أشكرك من الأعماق فقد استمتعت جداااااا

tweety tawe يقول...

أكثر شي كان يرعبني رقم 6
اتزيــــــــــــــــغ (كنت أحلمها وأصيح يوم أذكرها)

رقم 4 و1 كنت أكرهن بس ما أخاف منهن كنت أقول حق أمي بضربهم ليش جيه يسوون (متفاعلة واااايد)
عاد أهم شي ليدي كانت المفضلة عندي فيوم يصيحونها أعصب(كنت متأثرة أقول حق أبوية هاتلي حصان أبيض نفس ليدي)

والله ألحين المسلسلات تافه وتلوع بالجبد ما شي شغلة غير يزيغون اليهال (إخواني عايشين جو الرعب ويا وايد منهم فاللستة بطول جي)

على العموم شكراً

هاشم يقول...

كله كوم والآنسة منشن كوم ثاني (:

عزام الأكبر يقول...

ماشاء الله عليك تذكر كووووول ذول

أنا ماني مفتكر غير سالي وقصتها واسم ليدي فقط وهذاك اللي في فلم مولان

أقول مستر مطوع كم عمرك :) ... ؟

شكلك جد كبيييييير

(: Smile يقول...

صدق ان الموضوع شيق وفنان ... لكن انا ما ارضى على وحوشي أو الشخصيات الزياااغ

لو كان الرسوم ما يحتويهم ... كيف بيكون للرسوم طعم !!!

الروب استخدمته حق الكتابة ونفع ... لكن حق تجميع الصور شو تستخدم !!!

بس الصراحة ... عليك حركاااات ماستبسطهاش :)

غير معرف يقول...

( الكتابة خذت نص ساعة بالروب =) )
>> أهم شي :)



ماشاء الله ذاكرتكم قويه في تذكر الشخصيات الكرتونيه وأحداثها بالتفصيل >> للأسف ماذكر شي منها :S

وبالفعل قصة فيلم Hercules خربت عقيدتنا من قلب :P

" mime Al.shaikh "

الغلا يقول...

من جد كانت شخصيات تخوف وانا صغير

بس الحين صرت كبير و اضحك على نفسي منهم

التقوى خلاقي يقول...

رائع..
بس أقول الظاهر كنت تعيش مع افلام الكرتون بشكل كبير فتتأثر..
ماأذكر أني كنت أخاف أو اتأثر هالكثر..
مع أني أحبها كثير..
أكثر من رائع.

غير معرف يقول...

نسيت الضبابين في حماة الكواكب و جودي ابوت ومدينة النخيل "بلوظ وعلقم" وريمي والليث الأبيض وشرشبيل في السنافر وهيسوكا الي في القناص وعصابة الرداء الأبيض قي بوكيمون هم ونشيدهم الي يرفع الضغط أكثر من الملح قال "إنظموا إنظموا" قال!!! .... بس مع كل ها ما قصرت إبداع كالعادة ^.^
Sam

sky5555 يقول...

ههههههه ..
انا استمتعت هنا بالذكريات
:
نبغى بوست زز لاعبط الشخصيات
من عبسي وانت رايح
:
موفق يا مطوع

غير معرف يقول...

ما ادري .. ليش يتني عقدة من هالدبابير .. حد يقدر يذكرني ..؟

اقولك ليش لانهم فرقوآآ بين سوآر وامه
وبعدين بينه وبين اللي ربته
وما خلوه في حاله
عـآش يتيم حليله ]=
يوم اتذكر اريد اصيح عليه خخخخ
سلمت مستر ع انعاش ذاكرتنـآآ
بس نسيت السنافر و فله والاقزام السبعه وغيرهم (=

حيور لندن

غير معرف يقول...

اعتقد انك ما شقت رسوم " ابنتي العزيزة راوية "
ولا كنت بتكتب عن الآنسة حياة
رعب الدنيا ..!

lavender's aroma يقول...

صدقت كل اللي ذكرتهم خوفوني
وكنت أتريا الحلقة الأخيرة بسرعة
لان كنت متأكدة ان كل هالشخصيات بتختفي
أكثر اللي عقدوني كانت منشن، وإذا تذكرون رسوم كوزيت ( البؤساء) ما كنت أحب الريال والحرمة اللي كانوا يربونها
الرسوم زيغتني بس مب كثر مسلسلات الحروب مثل إخوة التراب وأيام الغضب
ما أقص عليكم بس يتني حالة نفسية منهم استمرت أسبوعين

تويكس يقول...

الله يسامحك بطني تقطع من الضحك انت مرة تتأثر بالرسوم
بعدين حرام عليك جد لينا يخوف لاانا الي يخوفني
يوم نزل عدنان ولينا بمكان زي الحديقة ولينا يمر بوسطها الولد ذاك الوقت دورني من الخوف
(والله حركات الروب ايش لونه؟؟)

غير معرف يقول...

يدي مستر يعطيييك العاافيه على هالبوووست ..
ترى كلللش ما اندمجت فييه .. ولا قعدت اقرااا بس عشان اووصل للنمبر ون @@

عاد اغلب الرسووم ماذكرها .. ماعرف حتى انا ماتأثرت بالرسووم هالكثر .. بس والله يوم شفت البارده اللي بوادي الأمااان ,, ردت فيني الذكرياااات لي ورااا ,, وهم تذكرت الجنطه اللي كانت تبيييها ><

انوااااع الرعب والتأزيييم كانت .. اصلا الحين يوم اشووف وادي الأمان اقول : والله ماعندنا ذوووق انا بعرف شلون كنا نتاابعه هههههههه

بس رسووم اوول كااان لها طعم ثااااااني والله .. ولا شراايك .!

يعطييك العافيه وكثر لنا من هالبوستات الجميله .. ماشاءالله اسلوووبك ممتع ومشوووق يحفظك الرحمن ..

T R A N I M يقول...

والله يونس هالموضوع ,,
رجعني ذكريااااااااااات , وفيه اشياء ما اعرفها
على طاري لقطة الباص , تدري وش المشكله , انه اللي يدبلجون الانميات ما يستوعبون وش معنى كلمة تصنيف
فيه انميات ماكان المفروض تعرض لنا كأطفال , وفيه انميات قصصها تصلح للكبار مثل انمي مرحبا انا اكو
كان كله عن وحجه توها متزوجة ووششلون تربي عيالها وتتعامل مع زوجها وام زوجها , بس اني كنت احبه وانا صغيره هههههههههههههه

,
,

أنا أتذكر أكثر أشياء روعتني وانا صغيره

مشهد موت موفاسا " أبو سمبا " جتني حاله ضايق صدري بشكل مب طبيعي بسببها , غير اني قعدت فتره اذا عدت الفلم اقدم مقطع موت ابوه ما ابي اشوفه , يجيب لي حزن ورعب مب طبيعي

واكثثثثثر شي أثر في حياتي , وقعدت فترة طويلة فيني رعب قوي وخوف , هو حلقة كونان اللي فيها الشخص ابو الضماد , اللي لاف وجهه بشاش , وهم مجبوسين بالبيت اللي بالغابة وقاعد يقتل فيهم واحد واحد
كان مرررررعب مرررررررعب ,, وصلت الحاله فيني اني ما انام زين بسببه , غير اني ادخل الحمام " الله يكرمكم " بدون ما اسكر الباب من الخوف " صدق اجرموا فيني بهذيك الحلقه :(

ومن الشخصيات اللي ذكرتها , أكره هذا ابو راس اللي في حكاية لعبه , اللي اخترعه ولد الجيران الشرير :D ياهو مرعب , بس بالاخير صار طيوب وتعلمت انه مانحكم على الناس من اشكالهم

,
,


وه قرقت كثير

اختك T R A N I M

gheyoom يقول...

هههههههههههههههههههههههههه
هالروب جي مسوي فيك تكتب من قلب ^.^" ماشالله عليك لوول ، عيل قطعه من اللبس دام جي السالفه p=

في بعض الرسوم مالحقت عليهم وفي الي احيد الرسوم لكن ماحيد الشخصيات عدل ودورهم الفتاك،

صحيح ان الشخصيات الشريره تسوي بلاوي فالعالم ، لكن عمر الرسوم ما غير مجرى حياتي وخلاني اصيب بالحمى بسبه الشر p= غير شخصيه وحده هزّت كياني الي هو مره طلع ف كونان وحاط شاش ف ويهه وكل مره يطلع من ورا الجامه، عاد كل ما اشوف جامه من بيتنا اتحراه وراه وتبدا التخيلات==

والت ديزني من يومها تخرب عقول الصغاريه وتخرب معتقداتهم من اي دين هم كانو =×
مالت عليهم الخياس ><"


يعطيك العافيه مستر^^

غير معرف يقول...

نسيت شرشبيل

غير معرف يقول...

متعوووووووووووووب عليه
استمتعت كثير بطرحكـ
و حسيت بخوفكـ
و ما الومكـ ابداً ...
كلنـآ تعلقْ أشيآء بمخيلتنـَآ ..
××

اختكـ | يآسمين ~
كنتْ هِنـآً ~

غير معرف يقول...

والله طرررررر


الله يعطيك ألف عاااافية

وايد حلو واستمتعت في القراءة ومشاهدة هالصور هع هع.....

غير معرف يقول...

حرام عليك وين إبن عرس حق جامبا =(

غير معرف يقول...

الله يبارك بارك الله فيكم

Fatma Qahtani يقول...

هههههههههه
عجبتني سالفه فيلم هرقل
بس فيه كراتين انا تو اسمع فيها منك
جاري البحث .......
بعد فيه كرتون مسبب حاله من الخلعه وهو جامبا وابن عرس

إرسال تعليق

كـلمـة ئـصـيـرة .. تـمحـي بلاوي كـتـيـرة