26‏/10‏/2009

مستر مطوع لاب









1- ربيعي امسات يقولّي ..... حمد ياخي ما تلاحظ إنك تمّكس العيشة فبطنك...؟


2- ربيع ربيعي " ما حبه بس ارابعه لأن ربيعي يرابعه . شو هالعقلية "



يقولّي : عفواً but الاوت لوك مالك mix



3- أم يابر تقولّي .... الله يقطع بليسك ... حد يحط الروب وصلصة الطماط و اللومي والسلطة والسمن والعيش فلقمة وحده ..؟


4- جتني رسالة عن سلطة مكس تقول .... ياخي اول مرة اشوف حد " يمزج " بين المتفرقات بهالطريقة المتميزة ^_^

5- واخيراً كلام احد كبار عايلتنا ... وهو إللي جعل هذا الأمر واضح جدامي

قالّي : شكلك تحب تخلّط يوم كنت صغير




يوم قال هالكلمة .... صدقوني ... فكأني دخلت في دواّمة الزمن " هذيج مالت عنابة " وعدت لأيام الطفولة


ايام الوصخ والبراءة ايام المرح و الضرابة


استرجعت ... بالتحديد كل صور ( المكس والمزج والجمع ) إلي كنت مهووس بها ... فهذه بعض المواقف إللي يت في بالي ^^






- الباركنق الأول -



كنت اموووت في الطبخ وما زلت . واجزم اني لو " تخصصت " في الطبخ ... سأبدع فيه .. اموت اسير المطبخ ... واعرف شو طابخين اليوم ... كنت استغل فرصة انشغال امي عن الجدر " القدر" واروح احط فيه اي شي ثاني وهي ما تدري ..

 مّرات احطلهم حشيش قاصنّـه من الحوش ... ومرات اقصقصلهم خبز وافرّه داخل .. مرات " achip" اسكب عصير تامّ من المدرسة ..و هذا سيري

( وهذا سيري ) : كلمة تقال بمعنى وهلمّ جرا أو " على هذا منوال" :)


طبعاً .. انا ماعرف شو يطبخون اصلاً .. بس جيه . افتح الجدر .. و " أعقّ "



ويوم وقت الغدا .. ونتيمّع كلنا ... ونبدى ناكل .. وانا وياهم !


الكل يمدح الغدا


^_^

عايلة متواضعه !


:::::::::::::::::::::::::::::::::::


الباركنق الثاني



تذكرون يوم كنت احط النبج فوق السطح حق اهل الفضاء علشان يختاروني :)


كنت احط النبج في طاسه حديدية بلون الحديد
وكانت هالطاسة من اثمن الأشياء في حياتي .. كنت اجمع فيها ما اريد .. حلويات -  العابي الثمينة  - غنائم اليوم - كل شيء


وكنت اقوم بجميع التجارب بها فتساعدني في الحمل والإستيعاب والخلط


كانت مكتبي التنقل في تلك الايام .. او ممكن تسمونها اللاب مالي ^^


تتذكرون في اسد الملك .. هذاك القرد الخبله يوم يسوّي خرابطيه في قشارة ..!




كنت شراته .. "سوورت ؤف !"


المهم كنت احب اخلط فيها " كل " شي يخطر في بالي


و انتظر النتيجة .... لا اذكر ادري ماذا كنت انتظر بالضبط ^^!


بس كنت متأثر بشي اسمه " اكسير الحياة " ... وإني لو توصّلت لهذا " الترياق " بكون اكبر واغنى بروفيسور ومخترع في العالم


(( طبعاً .. هالكلام قبل ما اكتشف .. إن الماينيز هو اكسير الحياة ^-^! ))


كنت اخلط اوراق الشير " trees " بعد ما اطحنهم وادقهم بالمدق .... لزوم الثيم :)




اخلطهم بشويت بترول ! و معجون اسنان وبيبسي وهلمّ سحباً


وكان اهم مكوّن من مكوناتي عند " الخلط " ...


الفودر










كان يسوّيلي جو ... بـ الرغوة البيضى ويعطيني احساس بأنه شي بيطلع من الـ " طاسه "


ومن اجمل الخلطات إللي ما بنساهن في حياتي وهي اني في قايلة من القايلات
" يعني before afternoon بيريود "


كنت اتجولّ ورى البيت هذا المصطلح انقرض هالأيام .. حد فيكم يسمع اليهال هالأيام يقولون :

شفت ورى البيت كذا =\ ... انقرض واستُبدلت بـ ؤنلاين و كونكت و مول و أنمي


المهم ... الظهر و الفاملي نايمة. وصلت ورى المطبخ ولقيت " منفذ " للمستودع .. إللي هو محرم علينا دخوله شرعاً ^^


وكان المنفذ عباره عن  فتحة قديمة لمكّيف كان محطوط فيها والحين مسكرينها بـ بليوت وصابغينها بنفس صبغة المطبخ فماينّنكر من داخل بس من ورى ينعرف ... 

طبعاَ .. خيال الطفولة فجّر مخّي...  اقول فخاطري هذااا هو المخبأ السري للعالم الآخر 
( نفس الباب الصغير إللي يودي لبلاد العجائب ) 
يعني تخيّلوا الأحساس .. أول مرة اكتشف باب سرّي وفي بيتنا بعد .. ومحّد يعرفه غيري ..!!!!


فكسرته ودخلت. طفووله :)


واول ما وقع عليه نظري ... كان كرتون فيري الأصفر ... جان ابطّله وألاقيه متروس
الافضل إني اوقف ترجمة لأن اللي ما يفهم رمستنا ما اظني بيكون وصل لهالسطر
^-^




وخذت " طرمّبة " وحده وفتحتها وإذا بفقاعتين صغااااااااااار يطلعن منها والوانهن بألوان قوس قزح
هل مكروهه هالكلمة ..؟




مرت اجمل لحظات حياتي  ببطأ وانا  ارمق هذه الفقاعتان البراقتان بعيناي الحالمتان .. و تفجرّ الحماس في جسمي ... وجان انقز من الدريشة واسير اييب الطاسة علشان ارد المطبخ واسوّي اكبر تجاربي بهالمادة إللي اكتشفتها ... وفي طريق عودتي للمطبخ ... ما خلّيت شي ما حطيته في الطاسه ... حشيش و " بقرو "

اتفاجأ بتيار الذكريات الذي يسري في داخلي عند رؤيتي لهذه النبتة =")







و طبعاً .. ما انسى النبج و الرطب ( لازم يكون فرش من العذج )

و " حفنة" من التراب .. وجان يشوفني اخويه العود " حمدان " .. و كانت عادته .. انه يصرقعني بكم طراق من غير سبب !

:: قبل كم يوم سألته ليش امبونك تصفعني .. يوم كنا صغار ^^؟
قال: كنت تقهرني دومك تربع في البيت وعندك شي تسويه بروحك ! ::

فخذت نصيبي من التكفيخ .. ورديت المطبخ ابسرعة و حطيت الطاسه و " جبّيت" طرمبة الفيري كاملة و من دون ماي فتقدرون تتخيلون المنظر ...


ودامني في الـ " ستور " خطفت عالسامان كلّه فـ حطيت كتشب و صلصه و طحين وقعدت اخلط واخلط واخلط


ألين ما استوى عيين " عجين "


ومسكت الطاسة وطلعت من الأستور ... من نفس الدريشه .. ورقيت فوق السطح ... وحطيت " الخلطة " تحت اشعة الشمس الحارقة ... الين المغرب ... عاد عقب ما خلصّن رسوم العصر .. سرت الدكان هذاك وماعندي غير " ربية "


جان اشتري فيها 2 آرسي واحد شربته و واحد جبيته في الخلطة وقعدت اخلط واخلط واخلط .... ويوم شارف " يوم الطفولة" على الإنتهاء .... قبيل المغرب .. زقرت اخويه ..واقنعته بإنه لو شرب من هالطاسة .. بخلّيه ينام على مخدتيه


( كان عندي مخده مرسوم عليها بابا سنفور .. وكنت اكره بابا سنفور وووااايد .. بس ارقد عليها عناد لأن اخويه هذا ياباها ) ..


فاقتنع اخوي وشرب طشّونه من اكسير الحياة ... واتريّـنا شوّي .. يمكن يستوي شي ^-^!


كان يدور في بالي .. إنه الحين بيشعّ بلون أزرق شرات جني علي بابا أو بتحيط عليه هالة من الطاقة الخضراء شرات ككيرو


أو بينفض عنه غبار الذهب شرات الجنيات الصغيرة ... ولكن ...


اطال انتظارنا .... و خيّم الصمت علينا وتبادلنا النظرات ولم يحدث شيء من ذاك .. سو أنه امسك ببطنه قائلاً :


ابى ابول .... ^_^"


فنهرته غاضباً ... فذهب وتركني وطاستي فوق السطح ... فأخذت اتأمل الطاسه .. ما بإمكاني فعله بها ... فقلت الخطأ مب في الخلطة.


الخطأ من اخويه ... فأخذت أجرب اكتشافي هذا .. على كل شي .. من الزراعة و الحيوانات .. و البشر احياناً !





:::::::::::::::::::::::::::::::::::::::::::::::::::




بعد العديد من التجارب والخلطات التي بائت بالفشل ... توصلت لاكتشاف اول مادة (قابلة للأكل) من قبل البشر





و هي كانت اللومي اليابس ... نحطه في المدقّ ... و ندقّه .. ونحط عليه شوّيت ملح ( اختياري )


ونلفه بألمنيوم ( قصدير ) بشكل كرات .


و نفتح فتحة صغيرة من تحت بحيث يتسرب القليل من اللومي مع كثرت المص أو اللحس .. وستزيد مدة الإستمتاع به .. خاصة في فترة ( التسطيل ) تحت الرسوم المتحركة .. ونحط ريلنا تحت مكتبة التشك تشك ونقعد نلحس اللومي .. ألين ما نموت عطش ... وبس


!

39 حـط تـعلـيـق:

نقاء يقول...

أحلى شي نتيجة التجررربه ... أبي ..... هاهاهاااااي ....
إنته المفروووض تتخصص فالمختبرااات مش نتووركنج .. ^^

غير معرف يقول...

3- أم يابر تقولّي .... الله يقطع بليسك ... حد يحط الروب وصلصة الطماط و اللومي والسلطة والسمن وخبز والعيش فلقمة وحده ..؟

تقصد انا واخوانـي جي نسـوى يوم عرس خوي حرمه خويه تقول شو هالخبصه ..؟!
بعدين خلونـآ ناكل بروحنـآ ..!

*كنت اتجولّ ورى البيت هذا المصطلح انقرض هالأيام .. حد فيكم يسمع اليهال هالأيام يقولون :
شفت ورى البيت كذا =\ ... انقرض واستُبدلت بـ ؤنلاين و كونكت و مول و أنمي

هيه والله صدقت ياخـوي
بس احنـآ الوالده تحبسـآ في الحيره علشان ما نظهر ف القايله بس كان نشرد بالدريشه هع
حلاتهـآ من ايـآم =)

* والله انـك تصلـح تشتغل في ف مختبرات الكيميا يمكن تخترع قنابل اقـوى عن الذريـه وبعدين ما نحتاج لامريكـآ وغيرهـآ هع هع << جنه دخلنـآ ف السياسه ..؟!
انـآ ما لـي خص ^__^ هع

ع العموم نتريـآ يديد حيـآتك
وبالتوفيـج مطـوعنـآ ^^

خاطـري ف للومي يابس الحيـن ^^

-{ Highness }- يقول...

YOU ARE UNBELIEVABLE

وصلت فييك انك تفر حشيش في الجدر؟ لااا و تاكل منه بعديين !!..

وايد بيكون باهر مستقبلك اذا دخلت عالم الطبخ ,, بس بشرط اللي بياكلون تتأكد ان بطايقهم الصحية سارية المفعوول .. !!


أخاف يابر يطلع عليك و تذوقون منه أشيا عجيبة غريبة "مخلطة" ., ^_^

غير معرف يقول...

مششششششش طبيعي انته هههههههههههههههههههههههههههه

اسميني ضحكت من الخاطر وكنت محتاجة الضحكة بعد هاليوم المتعب من الجامعة ...

علييك مكسات مب طبيعيه ..

سؤاااال >>
كنت اخلط اوراق الشير " trees " بعد ما اطحنهم وادقهم بالمدق .... لزوم الثيم :)
اخلطهم بشويت بترول ! و معجون اسنان وبيبسي وهلمّ سحباً
وكان اهم مكوّن من مكوناتي عند " الخلط " ...
الفودر

شو كنت متوقع النتيجه !!!!! وشو استخداماتها !!!!!!!!!!!!!!!!!!! حيرتني هالخلطه ^^



>>> دزاستر

S.M.G يقول...

يااخي مزجات هههههه
الله يفتح عليك زي ما خليتنا نبتسم ^^
تقبل مروري أخوي ،، ^^

غير معرف يقول...

ههُههُههُههُهه
قنبلةُ ابداعُ الصراحهُ ..
شقاوُة + فضوُل + براءُهُ = طفولةُ ناجحةُ
الصراحُه اكيدً كانتُ ايامُ فظييعهُ
بس حسافهُ يهالُ هالايامُ مابيكونٌ لهمُ ماضيُ كثرُ قبلُ
بيكونُ ماضيهمٌ بالسوفيٌ و البي اس بي
يعطيكُ العافيهُ مستُر مخترع ُ ^^!

kobi يقول...

ههههههههههههههه

عجااايب ،،

خطيييييييييير الصراحة ماشاء الله عليك تذكرني بنفسي و بخواتي و احنا صغار كنا كدة ،، نجلس العصرية لأهل نايمين ،، ندخل المطبخ و لعب بالفيري و الفلفل و و و ...

بس سؤال هل المايونيز اكسير الحياة >> هههه

lo0oly يقول...

هههههههههههههههههه

احلى شي القرد الخبله

هع هع

يحليله اخووك !

الحين كله بروحك ويوم خذته وياك خليته يشرب من اكسير الحياه مالك ؟؟

حرآآآم

ههههههههههه

مستوي الخيميائي مستر ..

اهم شي ان اهل الفضاء ماخذوك عشان
اتقول لنا هالسالفه ^^

في ترقب كل جديد لك مستر

M!Ss No Name يقول...

ههههههههههههه والله حركات ,, ع قولة استاذنا في حركة في بركه لوول ,,
ذكرتني بالمااااضي العريــــق خخخخ,, صدق شيطوووون بالقوووو ,,

احيد مرة كنت اسوي خلطه يدام باب البيت هععع العب بالتراب و احط فيه اشيا واخرشي أأكل اختي الصغيرة و هي لاتقول شي ,, لوول

وناااااسه ايااام قبل ,, واحب سوالف التلخبيط وااايد ,,

احلى شي يوم اخوك يظربك ههههه << شريرة ,, بس امم ليش الاخو الاكبر دوووم يضرب الصغير ؟

ثااانكس ,, وايد استانست يوم قريت موضوعك الخربطيشن ,, ^^

غير معرف يقول...

استمتعت بالقراءه و ما اريد اكتب تعليق ما عرف من وين ببدا و وين بخلص ^^

ربي يسعدك و يسعد هلك الكرامـ دنيا و اخرهـ ..

=]

A_Alrumaithi

3yoondxb يقول...

ههههههه ماشاءالله عليك ,, زين إنك كنت تطبق أي فكرة جهنمية ..

أما أنا بس كنت أتخيل .. وأحلم .. ولا إذا باشرت بالتطبيق بحصلي من ذاك الضرب الزين @@

غير معرف يقول...

لووووووول ما شاء الله عليك ياليت تخصصت في شئ علمي كنت بتطلع عالم ويمكن تفوز بجائزة نوبل ليش لا واحسك مجازف من الدرجه اولى ، اخباره اخوك بعد ما شرب الخلطه الي سويتها له ماياه تسمم او اي شئ لا سمح الله ؟
وبصراحه امك المفروض ما تخليك القايله بروحك انت خطر على نفسك والمجتمع خخخخخخخخخخخخخخ

على سالفة الخلط في الاكل انا جيييه كنت احب اخلط روب وكاتشاب ودقوس مع العيش
حتى كنت اطلب من الكفتيريا سندويج جبن و ماينييز وكاتشاب ودقوس وبطاطا خخخخخخخ ذكريات والله

lil.D يقول...

انا ماعرف شو اقول .. !
ولكن طفولتك حافلة بالمغامرات .. !
والتجارب على خلق الله !! ..
للحين ما نسيت السالفة اللي كنت كاتب فيها ماكل انت وبنت ييرانكم الرادو ولا مادري شو ماكلين -_-

لوول زين الله سلمكم !!
عيل هالخلطه العجيبه خليت اخوك ياخذها؟
ماغير الوالده قاريه عليه ولا جان راح فيها!!


لول ... ع فكرة حتى مدونتك مكس -_-

سلة ميوّه يقول...

والله إنك ضحكتني...


يازين هالذكريات الحلوه
ويازين ذيج الأيام
مع إنك شوي حسّرت بهالخلطات

بس ضحكتني
بوست رائع
طرح جميل
وسرد قريب للقلب
وسوالف وطواري أول
ويازين طواري أول

ومسلسلات الكرتون القديمه
و سدحتنا جبال التلفزيون
ولعانة اليّهال وعنادنا على بعض...

مافي ألة زمن إتردنا أول...

ساعة تكون وإلا إبريج على طريقة عنّابه:)
وإلا حتى دقمه.؟.( زر )

إتهقى لو فيه هالشي
و أخذنا عيال هالزمن شبيصير فيهم؟؟؟

أشهد إنهم ماراح يصدقون عينهم

وأكيد الانمي والستيشن والوي والإكس بوكس راح يُنسّى



بوست روعه...

دام قلمك كما تحب...وترضى


ودّي

Al-ain Rose يقول...

عجبني البلوغ مالك
رائع..

SCRIBBLE ..♥ يقول...

خخخخخخخخخخ

مكس عجييب ^^

يعطيك العافيه على هالبوست الممتع والله

سمو الأميرهـ ..ツ يقول...

مبين عليك تحب تمكس والدليل انك ترمس
إماراتي + فصحى +عنجليزي

فوقت واحد
زين انكـ ما تعرف فرنسي ،،عز الله رحنا قيها ..:d
..
واحن بعد كنا نمكس ،،بس اونه نسمي الخلطات كيماوي صدام حسين ،ف جيكات مسافي ،ونحفر فالحوي ونحط الكيماوي تحت ،،ونتخيل إنه فيوم من الأيام بينفجر ..
وعن مكتبة التشك تشك كنا نتظارب منو بيحط ريله ع المكتبة ..
سيم سيم ذكريات ..
و عن التمكيس ف الأكل ،،كلنا نمكس بس بالدسه ،،ما فينا نصير مضحكة ..
وأمثلة من التمكيس :
( نفج قوطي بطاطس عيدان +ونحط فيه لبن )) ،، ((عيش +روب+داقوس +ليمون ))
((تفاح +ملح))(( عصير ليمون +ونحط فيه ملح بدال الشكر ))
:)

غير معرف يقول...

ضحكتني من قلب

حاولت أنسى يقول...

شو مسوي انته ههههههههههههه
عيوني دمعت من الضحك..واللي حولي يمرون يحبون ايدهم ورا وجدام
خبلتني بتجاربك

بس سؤال واحد حيرني

من وين يبت البترول!!

يعني انا حدي حدي الصبغ يوم حاولت اتفلسف

خبرنا..ومنكم نستفيد

بنت الشيوخ يقول...

المشكله انه مايروح بوسط هالمكسات الا الي حولك
غداء بالحشيش
اخوك المسكين الي شرب الفيري
وهلم سيرا^ـ^

غير معرف يقول...

هههههههههههه
هههههههههه

و أخيراً نزلت شي من سوالف الطفولة!
أحس أنك عشت طفولتك بحذافيرها ^^ ما شاء الله ما شاء الله ،
{ طاولة التشك تشك كنا نظارب عليها و مرات توصل المواصيل أنه ننسدح جدامها بالدور XD ولكن الغلبة للأكبر =(

ياخي صدقاً !!
أنا أعتبرك كاتب مبدع مع التحية @_@

ليش ما تنزل كتاب ؟
أحس أني بخلصه ف يوم واحد -_-!

Samt♥AlbadoOo يقول...

اسعدك اللـه اخي الكريم

ههههههههههههههه >> مت من الضحك وقعدت اتخيل
واذكرت ايآم الطفولـه ,, اللـــــه محلآآهـآ

مآ شاء الله عليـك

جميلٌ برآئة الصغآر ,, وجميلٌ تحليلهـم للاشيآء وطريقة اكتشآفهم

يعطيك العـآفيه
لقد استمتعت فالقرآءه في وقتن احس بالانفجآر من كثرت ضغوط الدرآسه والجآمعه

سَماءُ طِفلَة }~ يقول...

مستر .. ممكس !! >> بدل مطوع !!

" فظيييييييع البوست .. "

رائع بكل معنى الكلمة .. جميعنا دخلنا من فتحة آلة الزمن .. وعدنا بمخيلاتنا لتلك الأيام الجميلة !! ..

>> صدق يهال اليوم مب عايشين طفولتهم ابددددددددددد .. تخيل في من اليهال فحياااتهم ما جاسوا الرمل !! .. ولا العبوا فيه ..

صحيح أني .. لست كبيرة بالسن .. ولكن .. أحمد الله أني لم أكن من أطفال هذا الزمان .. ذوي الطفولة المسلوبة !!

.
.

خلطاتك .. ذكرتني .. بخلطة وحيدة جربتها في حياتي !! >> وهي صالحة للأكل ..

" تفاح أخضر بالروب " !!

>> أحيد كنا نلعب " أنا وأخواني " .. الظهر كل يوم لعبة الطيارة !! .. >> لانه عدنا سرير بو طابقين .. فأونه فوق الكابتن والمساعد .. وفي آي بي >> خخخخ
وتحت مال الدرجة السياحية ..
فاللي يكونون فالدرجة الأولى يحصلون كأكل هالوجبة الفنتكية .. ومب مذكرة اللي فالدرجة السياحية يمكن موزة بس ..

خخخ ..


ولكن .. خلطاتك أنت .. بالفعل " فنننننتكية " ,,

>> كل شي بصوووب واكسير الحياة !! شي آخر ..

مستر مطوع يقول...

نقاء ......... والله يبالي أطبخ وافرّغ هالشحنات =)

غير معرف ......... بعّدنا عن السياسة .. و ذكرتني بعايلة عمّي .. عيالهم شرّ يحبسونهم في البيت وقت القايلة =)

هاينس ........ والله سبحان اللي خلق " عبقرية " الأطفال .. قاعد اشوف على يابر " إرهاصات " التمكيس ^_^


دزاستر ... انا كنت مهوس بلحظة تجربة الترياق ... على الناس .. واقول اكيد بيطلع شي غريب


SMG ......الله عالدعاء الحلو ^_^

كوبي ..... أكيييييييييييييييييييييد =)

مستر مطوع يقول...

looly....... هيه مستوي فل متل ألجمست

مس نو نيم .... حرااام عليج شريره وحده ^_^"


أ الرميثي ..... بسمتكم هدفنا =)

عيون دبي..... لاااا نحن وفّروا لنا كل سبيل التخبيييص

مستر مطوع يقول...

ليل دي ..... خخخ وسااااام عصدري =)



سلة ....... عجبني ردك .. وتشكرين عليه

روز العين ... عيتني كلمت البلوغ ^_^



سكربل ........ الله ياعفيج اختي


سمو الأميرة .... وااااااااااو بطاطس عمان وعيران .. فنننننننننننننننننننننن =)


حاولت ...... البترول الله يسلمج هذا يارنا إللي جدام بيتنا .. مسوي معمل لسيارته من عشرين سنه يموت فيها .. وسرقت من عنده طرمبة بترول ^_^

بنت الشيوخ ... الأقروب أولى بالمعروف خخخ p=


سمت البدو .... بالضبظ ... انا هالموضوع كتبته في عز امتحانات المد تيررمز ^(^ ( فيسليني يعني )



سماء .........يععععععععععععع 0.0" روب وتفاح ... روب وتفاح .... روب وتفاح .... لا ادشين موقعيه مرة ثانية ... لاعت جبديه والله .. لا وشمعنى اخضر بعد ^_^"

نبض الحرف يقول...

سواالف يوم كنا صغار

تذكرت لما كنا نحب نطلع السطح خاصة في وقت العصر
ونجمع اكل وحلويات وناكلهن فوق..
ايام حلوه وايام الحارة واللعب مع بنات الجيران صياد..سمك وو كروك ووضرابة بين عيال الجيران..وناسه

بس اللومي اليابس ..تحفةأول مره اسمعبها

سَماءُ طِفلَة }~ يقول...

" لا ادشين موقعيه مرة ثانية " ..

افااااااااا ..

انزين .. مب داخله !! هع .. وأنا اللي اوني يعني .. وحاطتلك موقع إهداء .. حسااافة ما شفت هالرد قبل ..

^___^ .. >> امزح طبعاً .. ما نصبر عن إبداعاتك ..

سحابه يقول...

هههههههههه ضحكتني ياخووي

للحظه توقعت انك قطوو من كثر ما تتجول فالبيت خخخ
المفروض تغير من مستر مطوع إلى مستر بو خلطه (=
<< وصدقني لايق

عليك بعض الاختراعات مزج غريب !!!

"كنت اخلط اوراق الشير " trees " بعد ما اطحنهم وادقهم بالمدق .... لزوم الثيم :)
اخلطهم بشويت بترول ! و معجون اسنان وبيبسي وهلمّ سحباً
وكان اهم مكوّن من مكوناتي عند " الخلط " ...
الفودر
<< شووو هالخلطه الكيماوية ,, تكفى قول شو الناتج!
خلصت عزبة البيت وانت ما اتوقع انك طلعت بنتيجه تفيدنا فالحياه loool

الوحيد اللي يكسر الخاطر اخوك
<< الظاهر ماعنده علم عن نوعية الخلطه ولا كنت كليت جم صفعه محترمه ^^


" بكون اكبر واغنى بروفيسور ومخترع في العالم"
<< أقدر هذه الامنيه الكبيره!!!!
بس يا حسافة اهل العالم خخخ
بصراحه أكبر وأغنى أتقبلها بصدر رحب
بس بعد تطلعي على خلطاتك بأنك تكون(مخترع)
<< اخاف تخرع الناس بـ هالخلطات lool (أمزح)


بس صج رجعتني لأيااااااااااام ^__^

<< وانا مختصه ف موضوع الخلطات وشكلي بكتب عن خلطاتي
p=


دامت خلطاتك بصحه وعافيه (=
وووو بتوفيج خيوو وإلى الامام سر

غير معرف يقول...

السلااام عليكم...

الصراحة..ما شفت حد عاش طفولته بالطول والعرض كثرك...

الله يحفظك..


ملاحظه:

حطيت ايميل ((GMAIL)) في الــ"هـوم دلـيـفـري" بس ماشي وصلني..

لا لباب بيتي ولا لباب ايميلي...^_^'

مع انتي ضغطت على رابط الأكتيف!!!




ُEng. Student

قوارير يقول...

السلام عليكم .......... :)

ذكرتني بواحد من أهلي بأيام الطفوله
كان بعد يسوي خلطات , بس صابونيه شبه عطريه:9
بس اهو كان شاطر ومخه تجاري , فكان يبيع علينا الخلطاته الانتحاريه =)

بس في كلمه..شنو يعني النبج؟


و عساك ع القوه :)

غير معرف يقول...

اللللللله يرجك يا شييييخ


شو هالخلطااااااااااات ويا راسك



عيل والله ان خلطتي انا اهون بوااااااااايد >> اندومي وروب خخخخخخخخخ

ميلاد يقول...

هههههه يازين ايام الطفوله

ميلاد يقول...
أزال المؤلف هذا التعليق.
غير معرف يقول...

القصهــ واااااااايد حلوه لدرجة قريتها خمس مرات وابا اقراها زيااااده واضني حفضتها ...^^ وماخليت حد الا قتله (وايد استانسو) بس انته وخووووك صرااااحه شي عجيـــــب ... يالله طفوله وعدت .. وانا شخصياً قبل ما ارقد اقراها ..^^

مدونتي

tweety-tawe.blogspot.com
تحياتي:
tame

غير معرف يقول...

يا سلآم عليك ههههههههههههههههه
أحـلى خلطة الصرآآآحه

غير معرف يقول...

تعجبني روح المثابرة عندك....go bro. gooooo :)

الطموح يقول...

من كثر ما نقعت ضحك شرقت الله يهديييك

بس صددددق انك فنتك شووو الاخ اينشتاين يمكن هع هع

Wesal_Al يقول...

طول وما أنا اقرا قاعده اضحك
ههههههههههههههههههههههههههه

تذكرت لما كنت صغيره كنت اخلط الأرسي مع الرمل ( بس الحمدلله ما كنت احصل طراقات شراتك ) هع
وبصراحه ليومك اكل العيش مع الخلطه العجيبه
( مايونيز, الشطة الحاره , وليمون , لبن , اهم شي الخل ) ^^

ويا طفولتك العجيبه كنت بصراحه مغامر حطمت الرقم القياسي وخيالك واسع ^^

الله يحفظك عسبت جذا صرت مبدع يامستر مطوع ^^
عقبال ماتخترع شيء يديد ^^

إرسال تعليق

كـلمـة ئـصـيـرة .. تـمحـي بلاوي كـتـيـرة