17‏/08‏/2009

Partly Cloudy

رسوم يديد من بكسار

يستحق 99% .. والواحد حذفناها .. لأمور شرعية =)

إللي ما اتشغل الفيديو معاه .. يدخل هالموقع

ما توقعت النهاية جيه .. ^^"

هل رسوم هالايام ... خرّب عقائد اليهـّال والصغار

طيب.. خبّرونـّا عن رسوم خرّبت " رسّخت " أفكار غير صحيحه في طفولتكم ..<< موب بالضرورة افكار اسلامية ..!

اعطيكم مثال

انا يوم كنت صغير ... كنت اؤمن 100% بوجود سكان فضاء ... وإنهم في يوم من الأيام .. بيّون ياخذوني من الكرة الأرضية .. علشان اعيش عندهم ... فكنت ... كل مغرب ولأسابيع ... أطلع فوق السطح .. واتريّاهم .. إييون ... و عقب قمت أحط لهم أكل ... علشان " يحبوني " و يقولون .. يحليله .. خلّونا نشلّه معانا

وهو أصلاَ القطوة اتيّي تاكله .... ..ومرات احط " نبج " نبق يعني

واحطه في طاسة ماي .. علشان يتم بارد .. واحطه فوق السطح ... واخلّيه .. لمدة 3 ايام او اكثر .. وارقى السطح .. والقى النبج " تفتّح " << هو أصلاً " اندحق " شبع من الماي ... و انفجر ... وانا اكنت اعتقد . .إنهم يّو هذاك اليوم ... وكلووه .. وفرحت وايد .. واقول .. دامهم كلوه بيوون المرة الياية .. وتمّيت . احطلهم نبج ... كل مرة " لأني اكتشفت إن اهل الفضاء يحبون النبج " ... ألين ما خلّصت نبج الحارة كلّها ... واذكر يارتنا " قلبوا ال ياء إلا جيم " صفّعتني .. لأني خلّصت النبج ...من بيتهم = )

هذا مثال >> وعطونا ما عندكم =)

15 حـط تـعلـيـق:

abrar يقول...

أفلام الكرتون = =

أخوية الصغير أمس كان يسألني ويقول : إلي في الفضاء يضربوا ؟ 7.7

بعدين قلتلوا أصلا مافي أحد في الفضاء بس في ناس يروحوا !_!

قال : يعني يضربوا ؟

قلتلوا لا ما يضربوا !_!

،،،

من جد أحس نحتاج ناس مسلمين يسووا أفلام الكرتون وألعاب البلاي ستيشن للصغار لأنوا بيها يقدروا يبنوا فكر الطفل ويرسخوا العقيدة فيه

والله يعطيك العافية يارب

غير معرف يقول...

اممم ما يفتح ماعرف ليش !

>> دزاستر

سلطان يقول...

حاولت افك الفيديو بك الطرق من صفحت المدونه ما يفك من اليوتيوب يقلي الفيديو غير متاح بدولتك(الي هي السعوديه) بسبب الحقوق وحتى اخذت اسمه وبحثت ونفس الشئ
ماادري هم مايبغونا نشوفه وﻻ كيف


ملاجظة: مافي اي دليل ان الفضاء مافيه سكان

قريت معلومة تقول إذا عددت عدد النجوم الشبيه بشمسنا
في المجرة و حسب احتمالية أن لديها
كوكب مثل الأرض يدور حولهاهناك عشر ملايين عالم ممكن
و 4 ملايين عالم بدرجة حرارة كافية للتطور(ماني متأكد منها)

والله تعالى يقول في كتابه الكريم ( ويخلق مالا تعلمون )

يعني ممكن يكون في سكان بالفضاء ليش ﻻ

شكرا

desires يقول...

ماحيد اني تأثرت بأي رسوم في صغري ..
<< امبوني عاقلة ..كخخخخ

بس احيد يوم اضارب ويا اخويه قبل لا اضربه اقول " ضربة اكيييييلا "
<< أقلد أحد ابطال الرسوم ..

أما قصة ابطال الفضاء هاي ضحكتني .. اسمي كانت عليك حركات تححححححفة

نقاء يقول...

يا عيني ع برااااءتك يا مستر ^,^
من صغرري مب واايد مع التلفزيووون وخرااابيطه ... ^^

التقوى خلاقي يقول...

بسم الله الرحمن الرحيم
اممممم موضوع جداً رائع..
وهذا ليس بغريب عليك^^حفظك الباري..
بالنسبة لي كنت اعتقد بأن المطر ينزل من..
((حنفيات..صنابير))مثل ماتسمونهم..فوق السحاب..
عندما يشاء الله عّز نزول المطر تفتح الصنابير..
وكان هذا الإعتقد مترسخ في مخيلتي..:)
والكثير من المعتقادات لاتحضرني الآن..
اعجبني افقك المتسع من الخيال..
جميلة الطفولة بكل احلامها..
بارك الله فيك..
اخيتك:التقوى خلاقي.
{استغفر الله واتوب إليه}

غير معرف يقول...

حطيت نبج ..هاه! يعني بيكون باتستدرجهم!!! ههه
اذكر هايدي...خلتني احب الخبز والجبن وخصوصا الخبز من كثر ما خشت فيه وكدست!:)
واذكر الزهرة الجميلة...قهرتني وهيه تبدل فساتينها من الزهور! ياما وقفنا جدام الجت (فيجيتيريان انيمالز دايت) ما صار فينا شي!
امتعتنا..
blue

M!Ss No Name يقول...

ذكرتني بأيااااام زماااان ,, دووم كنت اتخيل نفسي امم شرات الشجعان الثلاثه لوول لدرجه اني كنت احلم فيهم واكون وحده منهم هعع ,,

ثانكس عالموضوع الكشخه ,,^^

غير معرف يقول...

مشكور مستر مطوع
جميل جدا الرسوم

سلطان
سير على موقع metacafe
و ابحث عن cloud

بيطلعلك الرسوم كامل


heart rose

-{ Highness }- يقول...

السلام عليكم ورحمة الله وبركاته..

عدت بعد غيبة طالت يمكن شهر .. و الله ان ماشي وقت صدق الدورة غيرت وااايد أشيا في حياتي و أهم شي اني بدينا نحفظ جد .. و أنا الحين فسورة يونس .. دعواتكم لي أني أختم فرمضاان ..
المهم كانت دزاستر تقرا لي هالموضووع و جد تفاعلت ويااها و قلت لازم أرد ..
لأن هالشي صدق استوا ويااي يوم كنت صغيرة .. عاد أنا كنت شو .. أتخيل ان خواتي هم اللي من سكان الفضاء و نحن طول الوقت مغشوشين فيهم و فأي وقت ممكن يتحولوون فكنت في كل وقت أترقب هاللحظة ,, وذاك اليوم نحن البنات و عيال خالي و أخواني كلنا سهرانيين في الميلس الخارجي من البيت .. لأن لو الكبار دروا ما بيخلونا نسهر .. المهم ولظرفٍ ما .. بغيت أروح الحمام ( تكرمون ) و أختي التوأم كانت داخلة قبلي المهم ويا عبالها تخرعني الحبيبة ,, وأنا قاعدة اتريا في الممر و إلا تطلع لي و هي مفتحة أصابعها و فاتحة عيونها على وسعهن و تطلع أصوات الله لا يراويكم .. و عاد أنا قلت هييه أكييد تحولت ..و أصرخ لكم هاييج الصرخة اللي وعت كل اللي في البيت ..عاد هي بس كان ودها تخوفني ما كان قصدها .. و لما وصل الوالد العزيز شافنا ثنتينا نصييح و شو بلاكم شو السالفة مادري شو خرطت عليه المهم صدق اني حلمانه أو من نفسي متخرعة و ان هي تواسيني و تصيح ويااي .. و على هالحشرة يونا الجماعة اللي في الميلس و شافهم أبويه .. و عصب علينا ليش سهرانين ..و من بعدها كل ما يسهرون ما ييخلونا نسهر معاهم لأن خربنا عليهم,, ههه صدق عبط من الخاطر .. ^^

بنت الشيوخ يقول...

محد كسبان من اكتشاف النبق الا قطاوي السطوح ^^
::
انا ماكان يشغل بالي غير الساحره الي تظهر فجأءه وتحقق الاماني زي سندريلا وساحرتها
وكل مابكيت ولا محد اشترى الي خاطري فيه اتمناها تظهر وتحقق لي وأبكي بشده لعل وعسى تظهر وتحن علي << أيااااااام صدق

غير معرف يقول...

سلام عليكم..
اذكر ان اخوي كان متؤثر وايد بـ كونان
لدرجه انه كان يقول ان اخوني الي اكبر عنه
عطوه دواه شرات كونان عسب ما يكبر
0_0

مرفأ الأمل يقول...

السلام عليكم
أذكر يوم أنا صغيرة اتأثرت فعلا بالرسوم ، سنان ،سبستيان، وجورجي ، وسوار العسل ، والقضية المشتركة فها لمسلسلات أن البطله أو البطل ضايع عن أهله ، أو يزعل منهم ويسافر ..
المهم يوم كنت صغيرة طبقت الموضوع عدل ، يعني حوالي أربعة مرات لفيت ثيابي وطلعت من البيت ادور أهلي الحقيقين ،لكن في كل مرة يصيدويني ويردوني البيت !
براءة الطفولة
تقبلوا وافر التحية

مستر مطوع يقول...

آآآآآآآآآخخخ من ردووودكم ... =) ... اسعدتموني اسعدكم الله

أما مرفأ الأمل ..... خخخخخ سالفتها سالفة .. خخخخ اتصدقين سويتها . مرة ... ياااااه خاطري اكتب عنها ^-6

BookMark يقول...

اذكر الشي اللي كنت أعتقد وأؤمن فيه أشد الايمان ان الباربي والألعاب ملوتي يتكلمون ويلعبون مع بعض ويتشيطنون أول ماأهدهم وأسكر عليهم باب الدار (متأثرة اب توي ستوري1) لوول
لا والمشكلة كنت اكلمهم واقولهم اعترفوا وكلموني لاتخافون ماني قايلة حق احد هههه

شكرا على الموضوع .. أنعشت ذكريات الطفولة :)

إرسال تعليق

كـلمـة ئـصـيـرة .. تـمحـي بلاوي كـتـيـرة