18‏/04‏/2009

في بيتنا حريجه

السلاااااااام عليكم


في ليلة من الليالي الصيفية الساخنة .... وعلى مقربة من افتتاح المدارس للسنة الدراسية الجديده

كانت نفوس الأطفال .. على وجل وخوف .. وترقب .. و تعاسة من المدارس ..!


فبعضهم يتذكر ... الواجبات وضرب الإستاذ


وبعضهم ... يتذكر الـ " دواويح " و سواد الويه ^-^

والبعض الأخر يتذكر آخر يوم من العام الماضي .... عندما نشب بينه وبين " نص" المدرسة ضرابة .... ومتحلفيّــله عالحول

( الحول = يعني العام القادم ... وهيا كلمتون فوصحى لا نقاش في ذلك )

والبقية الباقية.... يتذكرون العامل المشترك الأكبر فيما بين الطلبة والطالبات هو

" نشـّة الصبح "

فالمساكين يحاولون ... نسيان ذلك .... بشراء مستلزمات الدراسة و فعاليات العودة للمدارس .. على أساس إننا فرحانين يعني :)


عاد نحن كان " مونانا" ... إن ابونا يودّينا " taKe us " صوب دبي ونتشرى هناك سامان المدرسة

لكن ابويه كان حالف ما يويدنا .. إلا مكتبة الحارة ...." أكرم " وربعه .. .لا و إذا لقى شي في الدكان ينفع للمدرسة شراه

.....؟ ! .....

إنزين عالأقل .... جمعية العين التعاونية ....إللي صوب الجسر

لااااااااااااااااااااا ^^"

الحين نحن وين نتفائل بالعام الدراسي الجديد ..... ؟


شغّل أبويه السيارة ... حمـّـلنا كلنا و

سرنا المكتبة " عاد خوز عاد " ... اللي يسمعني .. يقول مكتبة مجرودي الحين


وتشرينا إللي " يتشاهد " ... و إذا لقينا شي يديد ..." موديل السنة " ... شرات توي ستوري ولاّ اي فيلم من افلام ديزني اليديه ... ومرات مذيعين قناة عجمان TV تحيدونهم " وفاء تاج طيف مروان "

^-^

يقول ابويه .. لا ما تبونه

عندنا شراته فالبيت مال السنة الماضية ...... ^^"

....

عاد .. تشرينا على مضض ....=)

وسرنا البيت ..... و لا اخفيكم الحقيقة .... كنا فرحانين ... وايد .. باللي شريناه فالجديد .. جديد

.. وله " مزّة " خاصة ..

ونمنا بسلام ......... حتى استيقظت عند الساعة 1 بعد منتصف الليل

... يووووووووعاااااااااان ...

طلعت من الحجرة " البدروووم "

ونزلت على الدري .... وسرت المطبخ

وفتحت الباب .... ودعست عالفيش مال الليت

( الليت = هو هذاك القب اللي يتعلق فوق اليدار إللي يطلّع نور و كهرب .. ويقول طززززز )

ودخلت ... على أساس ان الليت بسرعة بيشتغل لكنه

كما تعرفون .... ما يشتغل مرّه وحده ... وقعد يشتغل ويطفي

تقول كأني " اندرتيكر " داش حلبة مصارعة ... اخذ يعطي فلاشات ...

دخلت .. وصلت الثلاجه ... وبصعوبة ليقت شي ينأكل ... صمّونه .. و قوطي روب ... وداقوس

والليت يضرب فلاشات .... وخذت لي كوب لبن .... و طلعت .. والليت يعطي فلاشات ... ويوم توّني بغيت اسكّر الليت ... اشتغل صح ...!

جان اقول فخاطري .... " وايد عليك " .. جان أسكّره .. واسير الصالة .. و " جبّيت = سكبت " الداقوس في الروب

و قعدت اغمس الصمونه في قوطي الروب ... واشرب لبن ....

" عيشة عيايز "

^^!

المهم ..... وانا قاعد آكل ... ولاّ وشوي .. اشوف سحاب داخل بيتنا ..............؟

والله مشهد غريب

رفعت راسي .. واشوف ... مثل الامواج على سقف البيت

ركّزت اكثر .. ولاّ يطلع ... دخان

دخااااااااان كثيييف لدرجة إن لونه كان اسود

كان منظر مخيف .. خاصة إنه الساعة 2 إلاّ شوي

حاولت اتتبع مصدر امواج الدخان الأسود .... فإذا بي ادخل " الجناح " الشمالي

قصر الإمارات .. مب بيت

بيتنا منقسم قسمين

الشمالي ... حيث غرفة " أمية و بويه " و غرفة خاصة لخويه وغرفة لثلاثة من خواني الصغار

والجنوبي ..... ثلاث غرف لكل من الاخوة الكبار ومنهم انا

فدخلت قسمهم ...وكان بابهم مسكّر ... ويوم فتحت الباب

حضنتي الدخنه السودا على البيضى

وفنص الدخااان .. اشوف اخوي ..... ماسك

" طاسه "

ورايح راد ما بين الحجرة والحمام

فدخلت حجرته ... ولاّ شوو أشوووف

ناااااااااااار مشتعلة في كل الحجرة .... واخوي ماسك هالطاسه

كبر إيده ... و أونّه يحاول .... يطفي هالنار ... بروحه من دوون ما يخبّر حد

كان كل شي يحترق .. إلا " الدوشق " إللي ينامون عليه

الستاير الزوليه الكبت المخدات

فزعت ف قفزت للوراء باتجاه غرفة الماما

ودقيت الباب .. بقووووه

فزعت امي ... تقول ... شو مستوييييي ؟

وانا ما عرفت ارد عليها ... وخففت الدق "لشي بتعرفونه بعد شوي "

وقلت لها بكل هداوة ... اميه فتحي الباب ...أباج في شي ...!

ثواني وفتحت الباب ... مستغربة

طبعاً امي عندها عاده .... أي واحد يوّعيها " يوقظها " من النوم .... تلطمه على وييه .. وبعدين تسأل شو فيك

فأنا متعودّ يعني ... وخاصة السالفة مستاهله يعني

قلت لها .. بكل صراحة واختصار

" حجرة اخويه .. تحترق "

سسسطننننننن

عويهي

وتدخل حجرتها وتوعي بويه

وتربع يمين ويسار .. ابويه مسك تليفونه واتصل عالإسعاف

وامي المسكينه .... تتحرى اخويه يحترق في الضو ... وجان تدخل فنص السنة النيران ...ادور عليه .. وهو في الحمام ماسك الطاسه خايف تضربه بسبت الحريجه

جان ... اصرخ عليها ... " ؤمّـي ... إنهو بخيييييير ... آذووه "

وازخه وارويها إياه

وهدأت .. وطلعت من الحجرة وسكرت الباب

وقامت وعّت خواني الثلاثة الصغار في الغرفة المقابلة

بكل عجلة ... وسارت القسم الثاني ... توعي الكل

واحد من خواني الصغار ... على باله توعيّه لصلاة الفير .. طلع من الحجرة ... ودخل الحمام ... يتوضى

وانا اشوفه .. يغسل ريوله .. أقوله شو تسوي ... قال بكل براءة ونعاس .. أتوضى ..!

جان اقوله .. طلع برى بسرعه .... ^-^

ويوم طلع عاد الحين انتبه للدخان " عقب الوضوء صحصح "

جان يقولّي بالحرف الواحد .... حد يسوّي دخون الفير .... ؟

عباله بخووووور

^-^

الشي الغريب .... ابوي اختفى ..؟

تعرفون .... وين راح ..؟

طلع الحبيب .. وسار غرفة اصغر العنقود اختي

وشلّها وياه .. وعقب سار غرفة .. أخوي اللي اصغر عنّي في القسم الجنوبي .. ووعّاه .. واخذهم ثنينهم ونزلوا الميلس .. وسكّر الباب على عمارهم

!!!!!!!!!!!!!!؟!؟!؟!؟!؟!؟؟!!؟!؟^-^!!!!!!!!!!!؟؟؟؟؟؟!؟!؟!؟!؟!؟!؟؟!

ونحن عيال البطة الحمرا ....؟

المهم

بعد تقريباً .... 50 دقيقة .. وصلت بالسلامة المطافي .. والدفاع المدني. . والشرطة ... والله فوق اكثر من قسم إللي لابسين احمر

واللي لابسيين اصفر .. والرصاصي .. والأخضر

بس الغريب أول من دخل بيتنا .. منهم ... كانوا ثلاثة

من أكشخ ما رأيت في حياتي

الكنادير كويتيه قطرية

نظارات شمية في المخابي

قلامة تلمع فنض الظلمه

غتر وعقال

وريحة عطووور

.. وداخلين وفأياديهم تليفونات

ومشبوكات فأذونهم سماعات

!

يا عيني عاللي بطفون الحريجه ... :)

دخلوا بسرعة ... يطمّشون أو بالأحرى .. يتفقدون الوضع

يعني ما اعرف .. .شو كانوا بيسوون لو شافوا حد بيحترق .. هل بعطرونه أو بيلحفونه بالغتر

او بيتصلون له رنّه .....!

والله ... ولفّوا الحجر لف .. ما خلوا حجرة ما فتحوها .. وانا وراهم

وعقب دخلوا المطافي .. هذيلاك .. إللي يطلعون في التلفزيون والرسوم

يالله يا كثرهم .... ما شاء الله عن يموتون بعد

فوق الخمسطعش

تلاقيت وياهم .. وانا طالع من الضو .. والدخنة

وهم توهم طالعين الطابق الثاني

وكانوا يمشون طابورين شرات المدارس

اول واحد في السيد اللي عاليسار ... " تروّع "

يوم شافني

طبعاً ... أنا هذيج الأيام .. اول سنين الإلتزام ... و مسّوي فيها سنّة إطالة شعر الرأس

ومربّي لي هذيج الكشة ..... العودة .. ومع الدخان ... تزاعلت كل شعره من ربيعتها .. فصار شعري واقف

المسكين يوم شافني ... عباله رؤوس الشياطين ... كانوا ماسكين شي أظن بليوت أو شي عود المهم هذا المسكين يوم شافني ... " عقّ = رمى " اللي كان ماسكنه وصرخ .... وضحكوا عليه ربعه

^-^

طلعوا السامان المحترق .. وطفت الضو ... وقفت الدخنه

وقريب آذان الفجر .. طلع لنا بويه .. واخويه واختيه من الميلس ... وعلى ويوهنا علامات الإستغراب

ليومنا هذا

...

سألت اخويه .. ليش شبت الحريجه

قال : يوم سرت المكتبة ... لقيت لي شمعه ... جان " اسرقها "

وولعتها في الليل .. يعني رومنسيه يعني ....^-^

الله يسامح ايام المراهقة

"()_()"

ملاحزة : عمره ابونا ما بخل علينا بشي ... ولكن عنده قناعات .. إذا اقنعته بعكسها ... يقتنع
ومنها كانت مشكلة ادوات المدرسة ... فالقلم الجاف بنص
والقلم الجاف إللي عليه سورة فلان ب4 دراهم .. ما كانت ادش مخّه الله يحفظه
وما عدا ذلك .. اشهد إنه مب مقصّر فحقنا طووول
الله يحفظه .. ويدخله الفردوس الاعلى . وآبائكم وأمهاتكم اجمعين
بس ليش ما شلّني انا بدال اخويه الثاني
؟

28 حـط تـعلـيـق:

بنت الشيوخ يقول...

تعرف ليش ماشلك بدال اخوك
كله من الكشه خخخخ
هههههههههـ
الحمد لله جات سليمه
وربي يحفظ لك الوالد واهلك جميع ويطول بااعمارهم في خير
<< للحين فيني الضحك
اسلوووبك رهيب

غير معرف يقول...

واللللللله نقعتني من الضضضضضضضحك ,, يبالك تكون عناا يوم انا احترقت ,,

صارت لي نفس السالفة تقريبا بس انا كنت العب بالكبيريت ونفس القصة ولعت فيني النار ومادقيت ع حجرت امي لسسب واحد وهو انها بتهزبني ,, يعني وقته الحين تهزبني والا اطفي النار !!

وصارت مواقف اتتتضحك والكل يبا يطفي الحريجة اللي شبت فيني ,, المهم ,,

نصييييييييييييييحة للعالم كله ,, خلوا عيالكم يجربوون الحرق ,, ولو شويه !!
عسب يستوعبون انه خطر ..

تسلم ع القصة والحمدلله ع السلامة .. ^^


>> دزاستر

حاولت أنسى يقول...

اسميني ميته من الضحك..
الحمدلله ع سلامتكم..والله شل اخوك والا شلك..ماتفرق الحمدلله انكم كلكم بخير وعافيه
و ما عورت قلبي وضحكتني الا يوم افتر راسك من ذاك الكف المحترم .. وانته شكلك روحك دايخ من ريحه الدخان بعد يعطونك كف

والا الثاني اللي يتوضى..زين يوم انه افتكر صلاه الفير مش قيام الله

والله حاله مآساويه

الحمدلله ع سلامتكم وقرة عينكم لووول

وربي يحفظ لكم الوالد ويطول بعره ان شاء الله

تسلم ع القصه..والله انها غيرت مزاجي المتعكر لوول

الغر الحشيم يقول...

ككككككككككك

وجآن اضحك ...

وحليله اخوك احسه كان مسطل من خااااطر ساير يتوضا هيهيهييي .. اتخيله بس

وانت ويا كشتك روعت مال الاطفاء هههههه

الحمد لله عالسلامة .. والله يخليلكم الوالد ..

ولعله لجأ لحماية اخوتك الصغار خوفا عليهم .. لانهم صغاار ..

^_______^

Rmadea ~ يقول...

ماتجي القصص الطويله الا وقت الاختبارات عندي
كلا اضحك وانا مهمومه :/

ليت تصير عندنا حريجه والله مغامرااات خخخخ
<< فال الله ولا فالي :/

الحمدلله ع السلامه واهم شي البطه الحمرا:)

غير معرف يقول...

خخخخخخ..
اسميني ضحكت وخاصة يوم قلت..
ان امك الله يحفظها تصفع يوم حد يوعيها من الرقاد..
ولا اخوك خخخخخ يوم يتوضى..
والله نكته.. وترا سالفة المكتبة والله كانا جييه..
ترا الشواب لهم قناعات شرات ما تقول..
انا ابويه اذا قال شي ما ترو تناقشه فيها..
الله يرحمه ويغفر له يااا رب..

الدمعة

humaid2 يقول...

لووووووووووووووووول , كعادة هالمواضيع طالعه ابداع , انا وولد خالي ايام اول كنا جبريت مان ( الولاعه غاليه اول P: ) وكنا نحرق كل شي اول لدرجة انه كنا بنحرق زرب خالي بس زين لحقوا علينا .الموضوع بزاوية واخوك اللي صار يصلي لحاله بزاويه مب طبيعي .

غير معرف يقول...

بصراحه اروع ما قرات لحد اليوم

وااااااااااايد روعه اسلوبك

هب متكلف ابدا في الكتابه

وووااايد تضحك وايد


ما اعرف احدد لك اي موقف من القصه من كثر ما ضحكت

كل موقف يضحك اكثر من الثاني

الله يحفظ لك اهلك

SheLLoO يقول...

لووووووووووووووول..

هل يعقل أن نبكي ضحكًا ؟
موقف طريف أزاح عني تعب العمل و"تكدّش" البرزنتيشن وصداع الرأس ;q

فعلاً استمتعت بالقراءة كالعادة وانتقيت مدونتك من بين كل المدونات في الريديدر لقراءتها لما في بوستاتك من البهجة والفرح ;)

حفظك الله وبارك لك..

نقاء يقول...

<<<< تضحك وضّحك البناات اللي وياها فالدواام
أول شي .. حمدلله ع سلامتكم كلللللللكم
ثانيا .. أخووك البرئ مووتني من الضحك .. الله يحفظه <<< أحس عليه علامات الصلاح والهداايه .. الله يثبته ياارب
ثالثا ... أسلوووبك طرررررر فالكتاابه ... يعني جنا قاعده اقرى قصه محليه ( يعني باللهجه العاميه )
ابصرااحه ما عليك كلام ... أبْدا"

grandline يقول...

بس "اكرم" للحين يعتبر شي كبير بالنسبه للمنطقه , على ايام ما كان زحمه عليه دوم بسبب البراشيم بس شكلها خفت وايد وصار يسوي انشطه وبحوث للطلبه .

مستر مطوع يقول...

بنت الشيوخ ....... أنا قلت جيه بعد .... الكشه هي السبب ^-^


دزاستر .... خخخخخ صدقج الحين وقته هزاب الماما ولا قاعدين نحرق :) .... خووش نصيحه .... محّد بيتمّ من العيال


حاولت انسى ..... عاد طراق الماما ....( طراقها والقبر ) ^^!

الغر .... لا تسبين الكشه ... اصلاً كنت استخدم بانتين ابسلم وشامبو ... بس تعرفين عاد الدخان والضو .. خرب البرستييج يعني ... :)


رمادية ..... هيه ليش جيه .. يوم يستوي اكشن فمكان و حادث مأساوي .. نتمنى يستويلنا .. شراته ... علشان نخبر شو صار فينا .. ونعيش الحدث ... صدق صدق يهّـال :)


الدمعة ........الله يرحمه ويغمد روحه الينّه .. آمييييين :)

حميد2 ....... الله يسلمك الغالي ... وعلى سالفة الجبريت .. هذا روحه سالفة .... الناس ادوخ زقاير ونحن جبريييت ^-^



شيلووو ... الله يسلمك .. وشكراً عالإطراء " المبالغ فيه " ^-^"


نقاء ..... عيل ليش مداومين ... علشان نضحك ... .^-^

قراند لاين ....... هييييييييييه هيه .. راح هذيج الأيام .... اتذكر كنت اوديله لوحه يقعد يرسم فيها شهر .... ^^! .. اونها خريطة العالم ... اخر شي تطلع دولة عمان بس ....خخ



واخيراً اقول :

لكل من تكلم عالأسلوب .. والإبداع ... اقول شووووووووكراً عالرمسة الطيبة ... وتراها لا ابداع ولا حتى إجهاد مخ .. كلّه جيه بالسليييقة " يوعتني هالكلمة"

و جزاكم الله خيراً ... و " ترس " الله ايامكم بالمسرات

^-^

غير معرف يقول...

الله يسعدك يا شيخ >> هع تتكلم سعودي

قسم بالله ضحكتني من الخاطر

والله اسلوبك طرررررررر ^^

زين اني دخلت عشان اضحك طشه هالامتحانات ذبحتناااااااا
دعواتكم اخواني واخواتي لي بالتوفيق عندي تست س 4 العصر

سي يووو ^^

ألياس}~ يقول...

أونة الكل بعد يمدح..!!!
خليتيني اضحك فليل .. جني ينية ^_^
الله يرحم والديك عاد انت وأخوك .. الصراحة "جدعان" ..
أديتو الدور عدل .. واحد ياي يروع والثاني ما يدرس وين الله حاطنه.. هــآآع

تسلم عالفرفشة "الغير نمونة" ..
الله يحفظ والدينك ..

grandline يقول...

>.> على فكره مطوعنا , تراه حميد 2 = جراندلاين , بس المصيبه لما احط اسم المدونه يختارلي على مزاجه واغلب الاوقات ردودي تروح بسبب هالشي .

SheLLoO يقول...

"مبالغ فيه" !!
--

إنما الكلمات التي تخرج من القلب تصيب الهدف..
ولو أردت المدح أو المبالغة فيه فلدي القدرة على صياغة الكلمات بحرفنة لا مثيل لها :]]

R o f i d a ~ يقول...

خخخخخخخخ
كان ينتظرك تجي تقولة شيلني الله يخليك ذذ
<< برى

الحمد الله على سلامة الجميع وسلامة بيتكم ،،

مستر مطوع يقول...

غير معرف .... موفق في الامتحان ... بشرنا


ألياس ............ آمييييين


حميد..... هييييه اكتشفت هالشي بعدين يوم دخلت البلوق مالك وقريت الأسم ... ^^؟



شيلوا........ عاااااد بس عاااااد ^-^" اخجلتم تواضعي :)

روفيدا ......الله يسلمك

-{ Highness }- يقول...

أول شي .. : ههههههههههههه ,, ^^


ثاني شي : ليش ما أحترق الدوشك ؟ هذا أول شي احترق في حجرة أخويه !!


ثالث شي : حد ياكل روب و دقووس 0_0 .. لااا مستحيييل أبد ما أتخيل الطعم ..كييف الطعم ؟؟ لااا و بعد نشة من الرقااد .. اسمح لي بس " yuck " >_< ,,

رابع شي : أخووك كم عمره ؟؟
لهالدرجة مسطل و مفتكر انه ممكن يطفي حريجة في الحجرة بكبرها بــ ( طااسة ) !!

أحلى مشهد عيــبني .. لما ع قولتك الكشة نااقعه .. و فلاشاات الليت .. حسيت صدق بالمشهد .. (انترتيجر)


أناا المطافي مرة وحدة في حياتي شفتهاا ..

كنا سايرين الشارجة .. و في دبي بنجرت السيارة .. و شوييه دخنت من يداام .. وإلا توقف سيارة فيها حرمتيين و على طوول مسكت التلفون و اتصلت بالمطافي ..
و تخيلوا عاد الموقف .. يمكن 4 سيارات مطافي و ريااييل و شادين حيلهم وحالة ..
و آخر شي سيارة تدخن بشكل بسييط .. !!
هههههه .. الحمد لله و الشكر ..


المهم مستر .. ان شاء الله تكون أول و آخر حريجة ..
حلوة الأكشناات .. تغيير روتين ..
:)

kobi يقول...

هههههههههههههههههههههههههههههههههههه

أكثر شيء ضحكني لمن خافوا المطافي ههههههههه

و لمن أمك ضربتك

ربي يحفظكم كلكم

و الله حكاية و لا أروووووووووع

Scribble يقول...

ههههههههههههههههههه

مب قادره اكتب تعليق من كثر ماضحكت

حسبي الله على ابليسك روعت الريـال

خخخخخخخخ

الله يسعدك ونستنـا بهالقصـه

غير معرف يقول...

هههههههههههههههههههههههههه
ضحكتني و أنا كنت ملانة و أتريي الدوام متى يخلص خخخخخخ
الحمد لله محد أفشني ^_^ و أنا أضحك بروحي بمكتبي نفس الخبلة رسمي ^_^
أتصور أمك الله يحفظها و هي تفتح الباب و تعطيك أكبر كف خخخخخخخخخخ أحلى شي أخوك حد يسوي دخون الفير خخخخخخخ
خخخخخخخخ تعال مستر كشة عندي سؤال ×_× من متى و تطويل شعر الرأس سنة *_* اللي أعرفه شعر اللحية << سؤال برئ لا غير ×_× لو كنت مكانك بروح قبل ثواني من دخول المطافي و بخلص غرشة جل على شعري لزوم البرستيج لازم نكون جاهزين و سامتين حتى في أصعب الظروف <<< برااا

( روح الأثير )

بقايا طفوله يقول...

أول شي الحمدالله ع الــسلآمه و محد تأذى منكم ..

يحليله خويك صج بريء هههههه سوالف الطفوله ^^
بس غمضني إلي تروع منك ههههههه.

و الوالد من العيله ما ركز( مشان هيك) يمكن الكشه لها تأثير :P

غير معرف يقول...

السلام عليكم ورحمه الله وبركاته

اول شي

ههههههههههههههههههههه

بكمل ضحكتي ...

ماشاءالله اسلوب مشيق وممتع

سالفه ماتحسدون عليها

الحمدلله على سلامتكم

كله كوووووووووووم واخوك ويا طاسته كووووم
وين يبا ههههههههههه شكله سووبرمااان يبا يطفي الحريجه بروحه

ولا امك وصفعتها هااااع ونااسه

اما اخوك اللي بيتوضا يصلي

هههههههههههههههههه

جتلني من الضحك

ماشاءالله الله يحفظكم

سالفه رهيبه يبالي اخبر ربعي عنها خخخ

تعرف شجعتني من زمان ماكتبت يومياتي

خلنا نستعيد الذكريااات

ذكرتني بموقف صارلي قبل 6 سنييين

ااااااه الوقت يخطف بسرعه

والله يرحم موتانا يارب

ماقصرت

يعطيك العافيه مطوعنا

+ الجناحي+

غير معرف يقول...

هههههههههههههه يحليله ابوك والله
اقسم باللي خلق سبع سماوات وارض انك هلكتني من الضحك
موضوع وايد حلوو ..

نحن مآصآر عندنآ شرآت الحريجه اللي عندكم .. بس مره نقع مكيف حجرة مرت اخويه .. وطلعت من غرفتهآ مشوووووووووط ويههآ خخخخ وشعرك ذكرني بشعرهآ هع هههه

دمت بود.. والله يخليلك اهلك يآربي

غير معرف يقول...

^_^

هههههههههه

الحمدلله ع سلامتكم

مستر مطوع يقول...

شكراً عالردود الطيبة والضحكات الغير شكل ....

إضاعة وقتكم هو هدفونا .... اشترك معنا الآن =)

maryoomz يقول...

ههههههههههههههههههههههههههههههههههههههههه
بطني عوّرني من كثر الضحك!!
والله عليك اسلوب فنااااان!
عيبتني المدونه مووت!
خلاص اعتبرني من متابعيك!
^^

وحمدلله عـ سلامتك انتي وكشتك وأهلك!
والله يحفظهم لك
D=

إرسال تعليق

كـلمـة ئـصـيـرة .. تـمحـي بلاوي كـتـيـرة