27‏/01‏/2009

ووك & وتش

شوفوا .. لا حّد يطنّز ... ترى هالبوست من احد اختراعاتي .. لا و مسمّيه الرفليوشن
لأنه بكل بساطة غيّر حياتي .....


::::::::::::::::::::::::::::::::



إلى كل .. دب ودبه
إلى كل متين و متين
إلى كل رشيق يتمنى الحفاظ على دزاينه
إلى كل رشيقة تتمنى أن تتمتع بسيقان مشموخه
إلى كل من يريد ذلك ... و لا يريد ان يضيّع وقته
اقدم لكم



ووك آند وتش
أو لسن ... عكيفكم !


بما اني مشغول بالدوام في الصباح ... وبالدراسة في المساء .. وبالبيت في المساء ... وبالنت في المساء .. والجيم في المساء
فما صار هذا ترتيب .. .^^


فرحت اشتريت مشّاية " جهاز للركض أو المشي ..عكيفكم"



وحطيت اللاب توب .. جّدامي .. إن فروت أوف مي
وقعدت امشي ... أول اسبوع لمدة ساعة ... اشوف رسوم مقاطع عاليويتيوب محاضرات أي شي
في البداية ... تقريباً لمدة اسبوع .. حسيت بتضايق ... لأن جسمي .. قاعد يسوي أكثر من نشاط في وقت واحد
ولكن بعد اسبوع .... تعودت ... وصرت امشي .. بالساعة و ساعة ونص .. واحياناً .. اطوف الساعتين << الله يخلي اليوتيوب بس


وبعد شهر ... بديت .. احس .. بالتغير ... صار تنفسي سهل ..... حتى بعد الساعتين
وصرت اتصبب عرق ... بكثرة .. بعد ما كنت يا دوب اتعرق
" ملاحظة : إللي ما يتعرق وايد بالرغم من التدريب ..فهذا موب شي صحي او طبيعي ! "


واهم شي ... خف وزني ... من الدهون ... وهنا اقولو الدهوووون الشريرة .. وليست العضلات الطيبة


وفي غضون شهرين تركت اللاب توب ..و اشتريت شاشة دسك توب كبيرة .. وقعدت اسوي بلاي ليست عاليوتيوب .. و play all وابدى "ركض " واقلل من الوقت ... لأني الآن أركض .. بعد ا كنت أمشي .... والحمد لله نجحت معاي ... ولا تحرمون أنفسكم
سوّا رياضة ... و خليكم بصحة وعافية ... و استغلوا اوقاتكم
وبس




نصايح عالطاير

- إذا بديت تسويّ إللي اقولك عليه ... لا تنظر في المراية " ميرور" أبداً إلا بعد شهر .. وكذلك الميزان
- أبدا في المشي لنصف ساعة لمدة اسبوع ... و ضاعفها .. إلى ساعة مشي في الأسبوع الثاني
- لا تبدأ بالركض .. إلا ... إذا كان عليك يسيرا
- إذا ركضت .... ابدأ تدريجياً .. و اكذلك إذا انتهيت .. توقف تدريجياً.... ( سو أمبورتنت )
- إذا ضربك صداع .. وقف مباشرة وروح امشي شوي ... واستريح وراجع دختور .. (لا تعمّلي فيها أبضاي )
- ابشع كلمة في الموضوع دا كلّـه ( ريجيم ) لا تنساه




اقول :

المشي والركض مع ريجيم ... نحافة ورشاقة
المشي والركض بدون ريجيم ... صحة و نفسية ممتازتان .. ؤونلي
^- ^


.... من زمان ما كتبت في الهيلث ....

12 حـط تـعلـيـق:

غير معرف يقول...

لوووول ,, والله حمستني للرياضة ..

صار لي اكثر عن شهرين احن ع اختي نسير النادي وانا أاجل وهي تأجل ><

>> دزاستر

غلا يقول...

ههههههههه

ماشاء الله زين بعد ..

متحمس وااايد ..
يلا مبروووك هههههه

desires يقول...

انزين واللي يبا يمتن ويرب كل شي ..

من زيادة كمية الأكل .. و النوم طول الوقت .. تجنب عمل أي جهد جسماني ..

ولازالت المشكلة قائمة .. شويسوي ..

مرة سمعت ان الرياضة ممكن تمتن .. دو يو هاف اني ايديا ؟!!

ramadeah يقول...

آهااا اللحين عرفنا سبب بوستات الدبل >.>

انا هالاله ودي اكسًرها وارتاح من ازعاجها وازعاج صاحبها,,انا مدري ليه مايمشي بالشارع ويريحني من الازعاج واللي قاهرني انه ضعييف ومسوي زحمه والشارع فاضي :|

انا اقول الهواء الطلق أفضل ! حق الصحه والنفسيه
اما اللي يبي ينزل وزنه فهذي الطريقه ممتازه ومسليه:)
بس تراها تخسر لازم الانترنت غير محدود كل شهر ><

ramadeah يقول...

دزاير
يقولون لك موز وحليب السعوديه =) ع الريق كل يوم
ووحده بوحده ^__^

منطلقة بطموحي يقول...

الله يعطيك العافية :)

Athari - المعالي يقول...

(:

كأني أشوف نفسي

دوام صباح و مساء بس قررت أنه مايعيقني شيء ودخلت جيم .. بصراحه فرق كبير في النفسية والـشيب ( الشكل )

حماس الرياضة و تغيير للروتين ، في البداية كنت اتعب بس مع الوقت تعودت خلاص وصار فيه لياقة ولا أحلى ..

بصراحة أنصح الكل بالرياضة لما فيها من تنفيس للضغوط ، وصحة للجسم ...

good luck `7eeo

c.u

مستر مطوع يقول...

دزاستر ....عندي قاعدتين في التدريب

1- لا تشتركين مع حد ... إني إبدي .. وعقب دوري حد .. .:)

2- إللي بدأ حماسه بشراء ملابس الرياضة .. عمره ما بيدرب . . .^-^؟

غلا ... ما شاء الله سبع تعليقات في دقيقة وحده .. نيو ريكووورد ^^




دزاير .... فحياتي ما شفت طبيب أو طبيبة متان ^^

اتخرجي وبعدين يصير خير....^^

ونعم الرياضة ترجع الجسم للشكل الطبيعي ... السمين ينحف والضعيف يمتن ... :)


رمادية .... شدعوا داخل البيت ماشي اكسجين .. !

انا مرات افتح الدريشة "الويندو" واركض ... و الأكسجين يذبحني من كثرته ... هيه عايش في نيوزلندا أنته ..!

^^


رمادية .... حليب ومز ... ذكرتيني بهالنسوان .. إللي مالين التلفزيونات .. في الشريط الأخباري ... بغيت خلطة حق زوجي .. واريد زيت المحبة .. .. وإللي تعرف سر الجمال .. تقوليّ ... و البارحة اكتشفت اكسير السباب


خررررررررررررررريط ... .^^"

بس الحليب والموز معروف يمتن .. والكوكتيل بعد و البيتزا والشبس المقلي ... واي شي حلو .. .:")

منطلقة...... الله يعافيج



المعالي ......... هاه سمعتوا المعالي شو تقولكم .... يلا شدواحيلكم . . .^^

غير معرف يقول...

هههههه

والله نصاايح راااائعه سلمت على وضعهاا

والله العيازه اتسوي البلاوي

بس ان شاء الله عاد نتحمس ونبدا بالرياضة


^^

غير معرف يقول...

Be aware of it
http://www.lakii.com/vb/showthread.php?t=415607

kano0o5 يقول...

ماشاءالله عليك اخوي
تسلم^^

والسموحه

Nazek Al-Asfoor يقول...

بصراحه شجعتني
بحط فيلم في التلفزيون من بكره وبمشي على المشايه
عسى اركض بعد اسبوع

إرسال تعليق

كـلمـة ئـصـيـرة .. تـمحـي بلاوي كـتـيـرة