15‏/01‏/2009

حياتي تيفزون آند مور


قبل كم يوم ...... امبوني يالس ويّا هليَه << ماي فاملي


وكان يابر " ماي سن " حاط راسه عالتلفزيون ... ومبحلج عيونه فيه ....


فهزبته << نهرته ..... و انا اصرخ عليه منّـيه ... ولاّ امي ..... تصرخ من هنيه عليّ


!!


تقوليّ ...... حرام عليك روّعت الياهل .... نسيت شو كنت اتسويّ ونت ياهل ويّـا TV .....


:: هنا تبدأ التدوينة صح ^^ ::





يوم كنت تقريباً في عمر الزهور .... " هي الزهور عمرها كم ؟ "


يعني ... يوم خذيت ليسن خفيف حق " اليلاّسه " .... يعني الياء نقربها

إلى اقرب عدد عشري تصير جيم .. جلاّسه إتس مين ذس ون





كانت أميه ( هاي هجتنا ..... اميه .. مثل " ما اغنى عني ماليه " )


كانت اميه تحطنيَـه ( وهلمّ جراً ^^ )


ما بخلص اليوم من الكتابة بهالطريقة .. اكتب .. نورمل احسن ......:)


كانت تربط اليلاسه بشيله .. بمكتبة التلفزيو ن... وتشغل التلفزيون وو تيلسني جدامه فوق ال3 ساعات


!!!!!


وتقول لي : اذكرك .. يوم ارد من بيت الييران = النيبرز القاك مسطل عالتلفزيون ...... << شي طبيعي .. تعودت ..!


وكبرت على هالحالة ..... و " تشربت " حب التيفزون .. هكذا كنا انسميه حينها .... من الطفولة





تابعنا الكثير الكثير من البرامج ..... الحين لو تقول حق خوانك ... إنه التلفزيون كان قبل 3 قنوات ... وإذا الجو بارد في الليل و حظك حلو يزيدن 2


قناة ابوظبي - دبي - عمان -

.....

وفي الليل تصفى قناة السعودية الثانية و مرات الأولى ... وقناة 33 الإنجليزية


بوظبي كانت الصبح مركاض وسباق هجن

وو الله عليج يا العنقى ...... سلامي عليج يا العنقى .. ... العقنى العنقى ...

... العنقى لصاحب السمو الشيخ الفلاني ..... ويتمون على هالمشوار

ألين الساعة 7 ويحطون شوي رسوم وعقبها و مسلسلات مصرية ... و اخبار ....


عمان .. كانت تحط مسلسلات عمانية .. و سمفونيات اوبرا عمانية من عقب المغرب .... ^^

كان في برنامج .. حلو .. وايد .. .فيه مذيع ... يمشي في السوق ومرات في الشوارع .. يسلم عالناس ويسألهم ... يونسّ



أما دبي .... فـ كانت مسلسلات سورية و برامج وثائقية ..... والاهم من هذا كلها .. مسلسلات مكسيكية ..... واااااااااو ^^



والسعودية الأولى .... كورة فكورة " أمووت على إعلاناتهم " ... قبل ما تطلع mbc


و الثانية أخبار و مسلسلات إنجليزية ... ( حد يذكر إلن )


اما قناة 33 .. فكانت ما تطلع إلا بعد الحوسه بالأريل .... وكانت الاحب إلى قلبي .. ففيها

الأفلام الرعب و الهندية والمصارعة الحرة مساءّ

اما في الصباح ... فكانت تنقل سباق الهجن .... ولكن هالمرة من اليمين إلى اليسار .. اونّه إنجليزي



هذا الأريل = النتينا



وكان معلق عالجدار الخارجي للمطبخ ... ولازم تظبطه باتجاهات .. لين يومك .. ما في حد في هالكون يعرف شيفرتها


فمرة ... بتلاقي السعودية .. إذا لفيته غرب .. و تقول خلاص ... بحفظ هالمكان ... ومن باكر ... لو حطيته في نفس المكان .. بتلقى دبي بدالها ..... !! وترد تلف في هالأريل ... خاصة عقب الغدا .. كان خويه .. يطرشني .. للقيام بمهمة تظبيط الأريل ..... فكنت اسير صوبه وامسك الأريل ... و درجة حراته .... 700 درجة فهرنهايتيه .... فأمسك طرف كندورتي ... وألف الأريل ... وأقعد أصرخ


صفى ااااااااااااااااااااااااااااااااااااااااا ؟


واقعد اتريّـاااااااااااااااااااا ... ويطول إنتظاري ... وعقب أسمعه ...


هييييييييييييييييييه ..... صبررررررررررررررررر !!


واقعد اتريا ... والله مرات توصل ... لين 10 دقايق و تزيد ... وأنا بغبائي .. اترياه يقول لي بس تعال


طبعاً اخوي ... يكون يالس .... ويتابع التلفزيون .. وانا اترياه خاري ..... = في الخارج


ألين ما يخلص إللي يتابعه هو ...


وتمضي ... القايلة = فترة القيلولة بكل مشاعر المحبة الاخوية .... فهذا يمسك راس اخوه .. ويغطه في الماي ... وهذاك يلعب مصارعة ويّـا خته ... ويخشّـعها تخشـّيع


أما انا فأيلس اجابل هالتلفزيون .. لين العصر .... إلاّ في حالة واحد فقط ...... وهي ّ


: أخويه حمدان :


هو اخوي العود ... أكبر منيّ بسنتين ... كان في فترة الطفولة ..... متين و ضخم للغاية .. ذو مزاج متقلب ... عصبي .. ولا يحب اخوانه

وانا على ما اقول شهيييييد


تعتري خوي حمدان .. حالات .. لا افهمها إلى اليوم ... فانا ..... الـTV بوي ... واخوي ..... الملك ..... في البيت ... ( بعد ما ينامون ابويه و اميه طبعاً ) .... فاحياناً ..... لا لشي ...... " يأمر " بإغلاق التلفزيون ...... فهنيه ... تركبني شياطيني الاربعة عشر ..... واقفز عليه ..... ونبدى ضرابة .... " وطبعاً " تنتهي ... بتكدمات في ويهي .... و تزليغ .. في ظهري ..... و فقدان بعض أظفاري ... ( حشى ذا الرقاع )

و كان هذا حالنا ..... في كل .. ظهيرة !!


وبعد ساعات قلائل ... تستقظ أمي ( باتومن )..... فارسة العدالة ... و تقيم الحق والعدالة في البيت .. وتشغل التفزيون ... ونقعد نشوف هالرسوم ....ألين الساعة خمس ... ما بين عمان و بوظبي ودبي ... وكانت اجملهم عمان ... احلى الرسوم كانت تحطها هيه


و ننسدح تحت التلفزيون .....ونحط ريولنا عالمكتبة ... وغالباً المكتبة فيها .. ابواب زجاجية .. تفتح و تسكّـر بتقنية الـ chik chik


إذا دزيتها بريلك .. طلعت صوت " تشك " و تفتح و عقب ... تضغظ مرة ثانية " تشك " و تقفل ... وهذا سيرنا .. طول العصر ... وتكثر ظاهرة التشك تشك .. .. خاصة إذا قاعدين نشوف شي ... مب فاهمينه ... او فقرة إلاعلانات ... و نخلص إعلانات ونرد نشوف
هالرسوم ... و فجأة ... يصب المطر ... وتسمع له .. صوت قوي .. طشششششش كل يوم نفس الوقت .... !
شو هالمطر .. إللي يصب كل يوم فنفس الوقت ...؟
عقب تسمع ... اميه .. تصرخ ... :
ســـكــــــروا الدينمه .... ^^"
انترس التانكي ..... :) يالله يا حلاتها من أيام
وكل واحد يأمر الثاني إنه يسير ... و في الأخير محد يقوم .. يسكرها ..
وتطلع أمي من حجرتها .. وتلطمنا كلنا ... الخير يخص والشر يعم
:)
وتسكر التلفزيون .. وتقول طلعوا برى ....
عقب نقوم نسير نلعب كورة .... او اي شي ثاني .. ويّـا عيال الحارة .... ( نسرق مثلاً )


ونرد البيت عالمغرب ..... وننسدح تحت هالتيفزون ....نتابع مسلسلات مكسيكية .. منويلا و اختها ....

و ماريا مرسيدس لاجلكم اعمل

و الحظ جاء جاء اليا


^^


ويرجع ابويه . ما ادري من وين ... كل يوم يسير .. ويرجع هالحزة ... مع إنه يداوم الصبح ... !! .. ماعلينا المهم


يلتمّ الشمل ..... ونقعد عالعشا ... وفي هالفترة .... تكون صدق

... فترة ود وصفاء. . و تبادل آراء ...

لأن الكل منهد حيله من هاليوم الحافل

( خنقتني العبرة )


ويقطع هالجو العائلي الحلو ... خاشوقة الدوا ...!!! الكبيرة


شايلتنها .. الوالدة ... بيدها ... وتلقمنا واحد واحد ... طبعاً ... نحن عندنا إذا واحد مرض .. أو ارتفعت حرارته ... تي أميه ... وتصفنا دور ... وتشربنا كلنا دوى الكحة ... وهذاك الزهري ... البنك . الغليظ .... كنت أكره .. بالرغم من ريحته الحلوة ... لأنه ينشب في الحلج ...

إنزين أخويه مريض . انا شو لي خص ؟


مافيه ... لا .. وأحلى شي ... إذا واحد فيه ..... دود فبطنه .. ما دري شو ماكل .. نبج ولاّ ورق شير ... تروح أميه تحضر الحلول ...


وتشربنا كلنا في نقس الوقت ..... طبعاً نحن في هذاك الوقت خمسه ..... و نتناوب على حمامين ......طول الليل .... ^^"


و كنت ...... اشوف الحلول .. على مرارته .. ومعاناته " حلاوة " مقارنة بالخيله ... هالـ خيله ..... كانت احد اكبر كوابيسي في الحياة .... وكنت .... مستحيل .. آكلها... ولو على جثتي ... و حتى عقب الضرب ... ما كنت آكلها .. ولكن البات ومن .. طلعت حاذجة ... و تحط الخيله ... في السمبوسة ... اجمل المقبلات ... ونصرط الخيلة ويى السمبوسة .... و ما اكتشف إني كلتها .. إلا بعد ما " أترّع "


^^


و احد اغرب التريدمنت إللي عشتها في حياتي .. يوم اصبت بالدوود فبطني .... و قعد لأكثر من شهر ... و ضعفت واااايد .. وودوني عن دالدخاتر ... و المطاوعة .... وما في فايدة ... .. وفي يوم من الأيام .... أشوف البات ومن ... تلمع عيونها في وسط الظلام ... و تمسكني. .. و اتوديني صوب المطبخ ..... !! ..... أنا اهنيه خفت .... قعدت أصرخ ... اقول ..: أميه .... شو فيج .. ! تخوفيني جيه ....

و أمطّ = اجذب إيدي منها .. وهيه ... ما شاء الله عليها الله يديم

عليها الصحة .... مطّتني بقو .. و دخلتني المطبخ .... شو تتوقعون شفت ... !!


شفت ... جدر كبير في نص المطبخ .. وتحته غاز مال الهريس .... و الماي يطبخ دخله .. وفيه ملابسي .. وفوطتي الجميلة ... و حتى فراش نومي ....!


اميهَ شو ها ... ؟


والله انا تحريتها بتسويني ساكرفايد حق الرب .. !


عاد الماما .. ما تكبدت عناء شرح الموقف ... لطفل في الصف الثالث ...... كل إللي سوته .. إنها شلتني ... و و حطتني في الجدر ... فوق اللحاف .. والملابس ... وقالت لي .. غط راسك في الماي ... ^^


يحليلها أميه .. سوتني ( صالونه شراشف باليهال ) إعداد الشيف : ماماتي


^ - ^


اتصدقون صحّيت ... !!




ياااااااه من أيام .... شوي شحت عن التلفزيون .. لكن لا تآخذوني ..... ما اقدر اركز عشي واحد ..

الصور و الذكريات متتداخلة ... و بإيدي ... اكتب عن كل شي في بيتنا

... الدرايش الحوش. .. الشير النخل .. الدروازة ...

جيرانا .. بيت السكن ... السكة ... حجرة الخدامة ... سورنا ....

..... اكلنا .....

^^

لكن .. في المرات الياية ... إن شاء الله


و سلام عليكم



: آبديتد سالفة الدينمه :

24 حـط تـعلـيـق:

لطيفة الحاج يقول...

تيبيكال طفولة عيناوية لول ..

سؤال: النبج بو الدود وعرفنا ان العيال يتموتون عليه بس ورق شير كيف بعد ياكلونه؟؟

كانت أيام والله =)
طفولتنا أحلى عن طفولة عيال هالزمان..

الله يحفظ لك الوالدة كاتومان =)

شسمهو يقول...

خخخخخخخخ
اقسم لك بالله نص اللي كاتبه كان يصير معاي
وخاصة سالفة الأريل هههههههههه
البدو حياتهم متشابهتون

تعرفنا عليك أكثر بو يابر
ننطر يديدك

desires يقول...

هع هع هع .. نقعتني من الضحك .. طلعت طفولتنا سيم سيم ..

حتى انتوا طلعت عندكم مكتبة قوم بو تشك تشك ..

بس على طاري الاريل نحن كنا اشويه مطورين ..

كان عنا جهاز يخلي الاريل يلف 360 درجة .. بس يالله اسميه حشره وبطيييييييييييييييييء

عاد نحن من نبى ندور على قناة فرينا هذا الجهاز .. والله الصراحه كان اختراع حلو

وعلى طاري الحلول .. نحن كان من طقوس بيتنا ان نشربه كل جمعه .. عوذ بالله .. كنت أكره هاليوم بس عشان أدري انهم بيغصبونا نشرب حلول ..

من نفج عيونا نشوف قلاصات الحلول مصطفة على الشرباك تتريانا ..

والله أيام حلوة ..

شكرا على ذكرياتك الطرررر ..

غير معرف يقول...

آآآخ والله ايااام اتجنن ,,
ااحلى الفترااات صراحة كانت الظهر ,, والضرابه ع الكييف كيفك ,, كله مرينا علييه الا الحلووول ما مريت علييه الصراحة ..

بس نحن كانت تطلع عنا عيماان >> عجمان >> القناة الرابعه ..
كانت امصخ قنااة بس لو اتي اتقارنها الحين بالقنوات الباقية والله تطلع شريفت مكة لوووول

بس ويييت انا ما فهمت ليش حطتك فوق ملابسك ف الجدر !!

>> دزاستر

UaE يقول...

والله أني ضحكت لين هذا منه , واللي يمر مستغرب ليش اضحك , كله صوب وسالفة يغرونكم الدوا من غير سبب صوب أمك شكلها بصير علشان يكون نوع من المناعه لكم , بصراااااااحة ذكرتني بأيام حلووووه



(( و ننسدح تحت التلفزيون .....ونحط ريولنا عالمكتبة ... وغالباً المكتبة فيها .. ابواب زجاجية .. تفتح و تسكّـر بتقنية الـ chik chik ))

نحن عاد كنا نتضارب منو بياخذ المكان الفنتكي قبل


الله يديم الصحة والعافية ع والدتك :)

غير معرف يقول...

مادري ليش يوم كنت اتسولف يا مستر ..على طول يت صورة بيتنا الجديم .. وعلى طول تخيلت الأحداث اللي تقولها تصير .. الأريل ,, المكتبة .. التانكي .. الحمامين .. بس كانت ناقصة المزرعة اللي يطل عليها بيتنا اللي كانت تصير فيها كل البلاوي ..


صدق طفولتنا غيير .. و إلا يهال هالزمان حليلهم .. يكسرون الخاطر ..


سالفة ع السريع :

في أحد الأيام و نحن رادين من صلاة التراويح مرينا الدكان اللي هو بعيد عن بيتنا و دوم نطلب بالتلفون و يوصل الطلبات .. المهم و قلنا لوحدة من خواتي الصغار تنزل و تشتري اللي كنا نبغيه ..
و نزلت الحبيبة و راحت و وقفت عند باب الدكان .. و تترياا .. و بعد شوي طلع لها راعي الدكان و هو مستغرب .. المهم قالت له شو تبا ..و بعدها واقفة عند الباب ..و نحن في السيارة ناقعين عليها من الضحك .. حليلها تتحرا ان هذا بيته أو شي جي .. و نحن نقول فخاطرنا الله يرحم أيام أول .. يوم كنا ندخل الدكان و لا علينا منه و نتضارب وياه بعد ..

و نفسها أحيد يوم أول مرة سارت الحديقة سوت لنا العجايب .. المريحانة تخاف منها .. و هي مب صغيرة واايد .. في سنها كنا نسوي البلاوي ..

فصدق شتان ما بين طفولتنا و طفولتهم ..

و بـــــــس .. ^^



-{ Highness }-

غير معرف يقول...

ههههههههه

يييييييت ع العوق
والله اياااااااام،،،سالفة الاريل صفى ولا لا والله بالضبط ونحط ريلنا ع المكتبة سبحان الله
صدقك خاصة وقت القايلة الضرابة خخخخخ
رديتنا لايام جميييييلة
ليتها بس ترد

الدمعة

PSv2.x يقول...

السلام عليكم و رحمة الله و بركاته .....
يخوي هالبدو حياتهم كوبي من بعض .... بس بفضل من رب العالمين أنا ما جربة الحلول بس جربت شي ثاني .... الكاز السائل .....

يا أخي ليش أحس أن الصينيين ما تعلموا النسخ إلا من البدو

على العموم تحياتي للجميع ... :-)>

بنت ابوها يقول...

هههههه ذكرتني بايام اول
كله ولا الاريل .. صاااافي, لاااا
صااااافي؟؟ ,لا
صااافي؟؟ , هييييييييييييي
ونستاانس بس عشان قناه صفت
واللي كانن صافيات اختربن "ششششششششش"
صدق عيال فقر ههه

مستر مطوع يقول...

لطيفة الحاج ........... كنا نحط أي شي فحلوجنا ونربع .. .. حبل سيم زور خوص صرانيخ ...!! ^^

شسمهو ...... ... ألله يرحم البدو إذا انا بدو .. ^ ما عرف شو الفرق بين صخله و نعجه وعنز و تيس وماعز وهلم جراً

مستر مطوع يقول...

ديزاير ............. آآآآآآآآآ خخخخخخخخخآآآآآآآآآآآه ضحكتيني .. والله

""
من نفج عيونا نشوف قلاصات الحلول مصطفة على الشرباك تتريانا ..

""

اتصدقين هالشرباك عندنا .... ^^

وبخصوص الجهاز إللي يدوّر الأريل .. كان عندنا فيه فصين وبس ... يمين ويسار ... ولوعة جبد .. فافيه إحساس ^^ .... وبعد في ضرابة من ضرابة القايلة ...
مجعت هالجهاز و فلعت به أخويه ^^ واخترب


دزاستر ..... مرة في عيد الإتحاد .. صفت قناة عيمان .. و ما صدقت إنتهت الإجازة و داومت في المدرسة .. وخبرت كل المدرسة .. ومحد صدقني .. .:)

واميه حطتني في الجدر .. أونه الدود ما يتحمل الحرارة .... ويموت ..... :) جست ذا تسمبل

مستر مطوع يقول...

uae .......... اوووه هالمكان احلى مكان .. ومرات نحط ريولنا و إي خوي الصغير ويركب فوق صيمي و هالعصاقيل تشلهم ^^... و آماين و أمهاتنا كلهن يا رب


هاينس ..... يا عني عالذرابة ... اونه .... عباله بيت راعي الدكان في الدكان .. منطقية البنية ... بناتنا اول .. يركبن ويا راعي الدكان و يردهن البيت .... !! قوية =9



الدمعة ......... والله شي اول مرة أعرفة .. إنه 90% من الأطفال عاشوا نفس الحياة .... :)



Ps ........... كاز ساااااااائل ..!!!

واو



بنت ابوها ...... هيه الباجيات اختربن وتعالي رديهين عاد .... صفىىىىىىىىىىىى ... ؟ ^-^

lil.D يقول...

ضحكتني سالفة الدينمه .. لوول ..

-_- ذكرتني بشير اللوز والتوت يوم نعفد ع الشير
ونركض فالسطح
وشلل الحارة

صدق حارة ههه

lOsT يقول...

سبحان الله أثاري قصص طفولة الإماراتيين كلها نفس الشي

أهم شي الحلول .. احيد كانو يشربونا ويقولولنا روحو سوو تمارين .. روحو اصعدو من الدري وانزلو كذا مره >> مادري شو الحكمه من الصعده والنزله !!


والكبت بو مرايه اشك ان اللي صنعه مسوي سحر .. مب معقوله الكل قاعد يتضارب عشان يحط ريله على هالزجاج !!

أما عن الأشيه اللي كنا ناكلها عاد عايلتنا المفروض تنحط فموسوعه جينز! >> مافي شي ما جربناه!! استغفر الله ما خلينا شي
مافي شير ماكلناه
وخلينا طبشوره الا وجربناها ..
لا في منه اللي جرب الغبار =/ !!

والله ذكريات ليتها تعود .. شكرا على هالتدوينه =)

أم عبدالرحمن يقول...

هههههههههههه

سيم نفر فوق انا يريد يقول

سبحان الله طفولتنا تتشابه

وين ذييج الايام ووين ايامنا هذي

الحلول كان شعار عايلتنا خخخ تذكرين لوست كل يمعه ههههههه

سالفة صالونة الشراشف عيبتني هههههههههههه غريبه الحركه

ربي يحفظ والدتك ياخوي

وتسلم على التدوينه .. ونتريا باجي الذكريات بالتفصيل الممل

غير معرف يقول...

>>>>>>> ساعة لما خلصت الضحك
احم
جنك يالس تكتب عني ... كل موقف مررينا فيه
تسلم ع الذكرريات الرووووووعه
ونتريا اليديد

غير معرف يقول...

اياااااااااااااام ="(
اتذكر بعد سالفة الفملي - اللعبه -
يوم يحر الكليب نخشه ف الكنديشن P;
حنيييت للبيت الجديم وكل شي =""(



*Rain Drop

خالو ميوم يقول...

هع تسلم عالتدوينة الصغيرونة اخوي
و الله ذكرتوني بايام شيرة التوت الي كانت في بيتنا
هع كانت نص الشيرة عالسكة عاد انا و اختي و بنت ييرانا كنا مسويين حزب اونه شو محد ايي صوبي توتنا > هع كل يوم ظرابة
انا حليلي كنت اخاف اركب الطوفة عسب اووصل للشيرة هع > باقي الحزب كانوا يركبون و ينطون هع

ولا عاد لين ناخذ توت و نعصره اونه عصير و نوصخ عمارنا ولا بعد ما نغسل التوت هع > ثلاثتنا يانا دود في بطنا هع
ولا لين نرد اليت عاد هني و الهزبة مع الحكومة ليش توصخون ملابسكم و ما اعرف شو هع اياااام صح ؟

ولا عاد ايام الاريل كانوا اخواني و خواتي يخلوني السكرفايز هع كنت الظحية و دوم امسك الاريل و لين اخليه احصل هزبة هع

ادري طولت كنت بكمل بس خفت انفلع من هني و لامن هناك هع


ثانكو عالمدونة كيب قوينق هع > مو فالحة بالانجليش

غير معرف يقول...

مشكور يا مستر مطوع ايام ما تنسَى ..

مستر مطوع يقول...

آآآآآآآخ يا شيرة اللوز ... انا ما فقرني غيرها .. كل سنة ايام الإمتحانات ... " تنشب " نعالي فشيرة اللوز .... ^-^ ما اعرف اصوب


لوست ......... ما شاء الله عليكم .. مب عيال اليوم .. ايسير بيتزا هت ... و يعوره بطنه و ما دري شو ..... اول .. ناكل حصى .. عادي " جنّي بالغت ^^)


ام عبدالرحمن ... خخخخ ضحكتيي اتخيل عائلة شعارها الحلول ... و يحتفلون به في المناسبات العائلية .... ^-^ ولا فيمتو


آآآآآآآآخ يالفملي .... كل يمعه نسير نشتري " قيرات " يديده لأن الاوليات " انسحتن "


خالو ميمو .... لا والله زيدي وزيدي .. سوالفج حلللللوة

خاصة شيرة التوت إللي في السكه ... نحن عندنا شيرة نبج

^-^

x616 يقول...

هههههههههههههههههه والله اني ضحكت لين قلت بس سبت الاريل ,, نقعد ندور فيه لين ايدينا تستوي طماط ,, حديد والدنيا شمس و عود ,, اخ ياربي وللحين هالاريل في بيتنا بس لاايستخدم هع هع ..

وهالتلفزون نشوف توم وجيري ونصه نشوف سباق الهجن كرهنا التلفزون والسبه هالسباق .. ^^ فحياتنا استوت كلها في الشارع ومانرد البيت الا نتكفخ ,,

غير معرف يقول...

ههههههههههه
والله ايام ... اذكر يوم كانوا اخواني الكبار يروغونا نحن الصغار عن المكتبه وبعد ما يخلص الرسوم"قلانديزر" يقومون يطبقون علينا

ذكريات ^_^
وقت القايله كنا نركب على السور ونلف عل البيت كم من لفه ونتخشش فالنخل كل واحد يتسلق نخلته ويلس ياكل من هالرطب

بس هالايام لو اشوف واحد من هالصغاريه يسوي الي كنت اسويه ياويله <<<< ليش؟!
... عرب زايد

غير معرف يقول...

هههههههههههههههههههههههههههههههههههههههه
ههههههههههههههههههههه

شو هذا يا مستر مطوع ذكرتنا بطفولتنا بأيامنا الحلوووووووه .. سلامي عليييييييك
اقرا شويه وخمسطعشر دقيقه وانا اضحك ع علوووووومك وارد اذكر سوالفنا وعلوم اهل السنينه

وازقر ربايعيه واقراى لهن الى كتبته ..

اسميك صدق من قوم بداووووووووو

غير معرف يقول...

وبعد ساعات قلائل ... تستقظ أمي ( باتومن )..... فارسة العدالة ... و تقيم الحق والعدالة في البيت .. وتشغل التفزيون ...

هههههههههههههههههههههههههههههههههههههههههههههههههههههههههههههههههه أول مرة أكتشف ان مو بس أماية اللي باتومن اطلعن كل عيايزنا باتومن هههه ربي يخليها لك ويحفظها لك من كل شر

أنا ما لحقت على هالأشيا أحسها صارت بزمن خواتي الأكبر عني :(

بس لحقت على الأريل كنت أستاااااااااااااااانس لين قالوا لي روحي فري الأريل ((( لابسة فستان وتحته بنطلون !!!! مال أوووووووول أحينة يوم أشوف صورتي أحس اني ملكة جمال أحينة هههههههههه أول الشعر كللللللله زيت والقصة شرات موجة البحر جي ههههههه والزيت حتى واصل يبهتنا والله مو قادرة أمسك عمري من الضحك كل ما أذكر الصورة ههههههههههههههههههههه المهم احليلي احط فستاني بو ورد مصاروة الوردة أكبر من راسي ع الأريل لأنه حاااااااااااااار واتم افره ... صففففففففففىىىىىىىىىىىىىىىى؟؟؟ أسمع صوت جماعي لا لا هييييييييييييييه هييييييييييه خلاص خليييييييييييه افففففففف رد افتر تمي تمي لا اتيييييين ... بس الحمدلله عقبها بسنة جذه اتطورنا يابولنا (الدش) هههههه... أنا ناااااااااااسية هالأشيا بس لين قريت اللي كاتبه ذكرت ....

سلمت أناملك أخوية ... أسلوبك أكثر من رائع ماشاء الله

إرسال تعليق

كـلمـة ئـصـيـرة .. تـمحـي بلاوي كـتـيـرة