12‏/07‏/2008

احراجات 2



هذا في يوم من الأيام كنّا في حديقة ملاهي الهيلي .....!! مال اول


طبعاً العايلة كاملة.....10 مع البابا والماما.... (قولوا ماشاء الله )

وكان اخر الذرية .. أختي الصغيرة و شوي متشيطنه ... وأسمها....لطيفة

ويوم حد يسألها شو أسمج ترد: (( يييفه)).

أعتقد الإماراتيين يعرفون معنى الييفه

ييفه = الجيفة

وفي الحديث (( من جيفة حمار)

المهم

ونحن نلعب في الملاهي في اليل وريحة الفرّاخ فايحه هذيج والزحمة

ضاعت لطيفة


وقعدنا ندوّر عليها....وندوّر وندوّر وندوّر

بيني وبينكم انا عيزت من الدوارة .. جان " اطبّها " و اسير المسرح الكبير وايلس فيه .. حتى اذكر كانت ليلة كاظم الساهر ..
(يع ما دانيه )


المهم

كانت البنت عند السكيورتي صوب البوّابة ووكل مايسئلونها شو أسم بابا علشان ينادونه بالمنادي تقول: بابا

طيّب شو أسم ماما؟ تقول : ماما

"بنيّة منطقيّة وايد"


وعقب سمعنا...مكبرات الصوت تنادي .... لدينا طفلة ضائعة واسمها.............(( ييفه...))

!


كل خواني فرحوا صاروا يزاقرون وينادون ((هي هاذي أختنا ))

ووصاروا الناس يشوفونّا باحتقار ..؟؟

حد يسمّي بنته ييفه.......وبعد ما لقيناها... شفناها تصيح و محتشره وربعت= ركضت

للوالدة وضربت إيدها وقالت:ماما أنتي شو أسمج ..أهء أهء أهء


=)

:::::::

ومن الهيلي .. إلى المطار


الحمد لله . .إني معروف في العايلة بالولد الملتزم ...فكانت اي حرمة في العايلة تبى تسير العمرة .. تاخذني محرم

فالحمدلله .. في السنة اسير على الأقل 2 وتصول 4 مرات .. قولوا ماشاء الله


ففي سيرة من هالسيرات .. رhحت ويّـاي عمتي العودة ... هاي العمة عاد .. حفلة و تجتلني من الضحك ( إن شاء الله راح اخصص لها بوست كامل )


فيوم ركبنا الطيارة ... حرصت إني ايلس عدالها .. واول مايلسنا ... جان اشوفها بعدها واقفه ..! ..: عمووه يلسي


قالت : ولديه الحين الطيارة بتطير من هالصوب( وأشارت إلى اتجاه كبينة الطيار)

أو من هالصوب ( وأشارت إلى مؤخرة الطيارة)...؟

جان ابتسم :)

قلت : ليش تسألين

قالت : مشان أعرف كيف أقعد !


عاد على برودها وبساطتها .. يلست اضحك عليها ... وسكتنا لفترة


:::::::

عقب يوم طارت الطيارة قالت : يا ولديه لو خلـص البترول ونحن نطير شو بنسوّي ...؟

قلت : بينزلون الرياليل وأندزّها ( ندفعها من الخلف).......!

قالت: يحليلكم ..مب برد خاري ؟

:بعد الترجمه :

ألن يكون الجو بارداً عليكم

(المسكينة نست معلومة مهّمة....نحن على إرتفاع 1200 قدم. )



:::::::

وبعدين جتنا المضيفة

دومدوم تك تك دومدوم تك تك


تفضلوا المناديل(وكانت المناديل مبلولة بعطر منعّش وساخنة)أخذت عمتي وحده من السلة واول ما لمستها صرخت

واااااااع يعلّكم السقم كلّكم

يالخايسه....يالوسخه

معطيتنّي= عطوني

كلينكس متمخّطين فيه
^^"




:::::::
وعلى طاري عماتي .. عندي عمة ثانية .. مرررة ما ترمس .. ومؤدبة وخلوقة

يوم سرنا الحرم تمـّـت توزع صدقات بالهبل .. جان يخطفونها منّـا .. حتى نحن ما فقدناها إلى عقب صلاة الظهر .. ولا حد شافها
المسكينة أخذوا فلوسها كلّها ورجّعوها لنا بعد العصر وهيه ما تعرف شو السالفة

والين الحين هي على بالها كانت  معزومه عند ناس
:)

12 حـط تـعلـيـق:

HamoOora يقول...

السلام عليكم


مواقف طريفة فعلا سعدت بقرائتها..

يعطيك العافيه

غير معرف يقول...

هههههههههههههه

صراحه بووست نقعني من الضحك ..

اذكر مرة ف الهيلي بعد مستاانسة ع عمري واز عربانه اختي وهي صغيرة وانا اشووح بها واشل ع التايريين >> حشاا ولد خخخخخ

لين جلبتها ع ويههاا .. ولين يومك في علامه صغيره.. والوالد يااه شد عضلي لانه اول مرة يركب قطار الموت والوالدة دوخت ركبناها لعبة الاخطبوط ,, هع هع ومن ذاك اليوم ما سرناا رحلة عايليه لهناك ..

خويتك: دزاستر ..

bu saad يقول...

كااااااااااااااااااااااااااااااك
لا لا لا شي عجيب مت من الضحك والله انك راعي سالفه(نكته)

موفق

لؤلؤة يقول...

خخخخخخخخخ
يا حلاة العزيمة والله ....:)

قَـلَمْـ ة رَصـاصْ يقول...

هههههه
أحب سوالف العيايز و الكبار في السن

أتسير العمرة 4 مرات في السنة
O_o
لا لا تخاف قلنا ما شاء الله
الله يرزقنا بعد بـ سيرة و لو مرة وحدة ><

يا حليلها الثانية اللي خطفوها
تتحراها عزيمة على نياتها الحرمة
ما سألتكم عن البيزات وين سارت؟؟

مستر مطوع يقول...

تراكم ماقلتكم ما شاء الله


و المهم بسمتكم

=)

الياقوت يقول...

صراحة عماتكم عجيبين ماشاء الله : p

أمّا الثانية فديتها يحليلها فعلاً هادية

ومو حاسة بشي <>

cute.lavender يقول...

ماشاءالله / رزقكم الله زيارة البقعة الطاهرة دائماً،،

أفرحك الله في الدنيا والآخرة كما أضحكتنا
=)

دمتم بخير

مستر مطوع يقول...

آمين يا رب العالمين


ويزاكم الله خير عالردود

lil.D يقول...

آخر سالفة >_< ... صدق مستر مطوع !! ولا كاتبنها يعني ع طريقة سوالف؟

مستر مطوع يقول...

عمتيه الضايعة .....!

هيه صدق .. ^^ كانوا افارقة وللين للحين تمدحهم

غير معرف يقول...

والله انه عماتك طماشه .. هههههههه اونه مشان اعرف..

الله يحفظهن ويخليهن لكم يارب ويطول بعمارهن..

احيد مره سرنا هيلي و اونه عاد رايحين مكان حلو و لازم نكشخ...جان يلبسون اختيه بجامه يتحسبونها بدله ههههههههههههههههههه

هههههههه اونها كااااشخه الحبيبه ههههههه

إرسال تعليق

كـلمـة ئـصـيـرة .. تـمحـي بلاوي كـتـيـرة