13‏/06‏/2008

شنغريلا دبي



سكنت البارحه في فندق شانغريلا دبي إللي على شارع زايد والحمد لله


طلعت غرفتنا باتجاه الغروب ...فكان المنظر إللي يأسر الألباب والله








الفندق ... وايد وايد وا ... ( بس وايدتين كافي عليه) ... حلو


اعطيه 8 ونص من عشرة .... ليش عاد ... ما ادري بس جيه




احلى واجمل و افضل ما لفت نظري في هالفندق


هو الخدمة الراقية و الملكيه






صدق يوم قالوا في المنتديات إنهم يعالملونكم جنكم ملوك ... تدرون .. يوم دخلت


الفندق


... أول ما رحت الرسبشن ..


وعرفت عن نفسي بالمعلومات ( على أساس حاجز بالفيزا )


قال أسمي بصوت شوي مسموع ... وبعد شوي .. جاني هندي


بحلاوا باتشي.. وقال تفصل مستر حمد


! ... كيف عرف أسمي ..


يمكن سمعه من الرسبشنست


وبعد شوي ... جاني واحد ثاني لابس ابيض .. ياب عصير تفضل مستر حمد .. !


عقب إللي بركن السيارة


.. تفضل مستر حمد ...


أسمييني تشققت من الخقـّـه :)




الكل حتى البحرمة في المصعد تفضل مستر حمد .....اهنيه عاد اول ما دخلت


المصعد قعدت أقول للحرمة .. انتي كاتبه اسمي عالكندورة ؟




و كان جيه الحال في المصاعد والمسبح والسبا و الجم كلهم يقولون اسمي


:)






المهم






قررنا ما نطلع من الفندق ... لأننا


ضعنا ضيعة بني إسرائيل ... يالله يالله وصلنا .. لأن محسوبكم


انسى وين أسير وكله افوّت اللفات





فلاش باك

المسكينه الحرمة .. يوم عرسنا ... كل ما نطلع من الفندق ... نضيع 4 ساعات .. ونرجع


مدوخين ..:) لا .. وما نتوب .. نييلس ساعتين في الفندق .. وبعد نطلع .. نقول ما


بنضيع .. لأننا خلاص عرفنا الدنيا والشوارع


وأول ما نطلع ... تكون غربت الشمس .. وتلونت المباني والسوارع بليتات حمرا


وزرقا و تغيرت الدنيا .. ونضيع لنا كم ساعة ونرجع مودخين

مسكينه هالحرمة :)



نعود للفندق




شوفوا هاي الحجرة << << حجرة ! صدق مب ويه فنادق




^-^


قصدي الغرفة إللي حجزناها



ولأننا قلنا ما بنطلع من الفندق .. فسيدا حجزت موعد


مع المساج وسويتلي سبورت مساج يعني اوني رياضي


..إلا قطع ظهري و اصبوعي ... بس اول ما تعودت عليه يمكن


بعد 20 دقيقه بدى يخفف عليّ


و خذت لي غفوة شويه ... و كانت


تجربة


حلوة وايد





عقب رجت الـ " غرفة " ولقيت الحرمة جاهزة حق العشى


ونزلنا المطاعم واخترنا مطعم مراكش المغربي

لأن فيه شبه غرف أو بالأحرى محاريب .. وفيها شويت ستر .. وبرايفسي


ملكي طلبنا طواجن دياي وكسكس ملكي
الصراحه الكسكس .. كان يشبه السبوس مال الهوش .. عليه


صالونه ... لكن الطواجن .. كانت خطيرة خلصنا عليها

الصورة هاي مصورة بالنهار .. ولكنهم ما يفتحون إلا ليلاً .. و في


الحقيقة .. كان جو المطعم من أرقى الأجواء والشغالين فيه كلهم

مغاربه وحبوبين



رجعنا البيت <<< اكملت .. فندق ابوك هو !
اقصد الغرفة ... و قضيناها سماري عقولت فرقة الدار .... ونمنا بكل هنى

واول ما انفجر الفجر .... سمعنا صوت مؤذن المسجد إللي خلف الفندق ... وكان


صوته جميل للغايه يشبه صوت ناصر القطامي

ولما اصبح الصبح ... نشرت صوب المسبح .. .. وتسبحت عقب


رجعت السبا وخذت لي جاكوزي .. وسونا وهالسوالف ..



وتريقنا داخل الغرفة ذاك الفول .. والشكشوكه الخطيرة ... عقب
تشاورنا .. جان ناخذ عمارنا ونسير حديقة الحيوان القريبة


ملاحظة : ( كل شي قريب من شارع زايد )

واستمتعنا بزيارة الأهل والأقارب و الأأصدقاء .. وشد انتباهي النمر .. لأنه


كان وايد معصب وهايج .. و قلت فخاطري : لو ينقز علينا الحين


لول ... ونااااااااااااااااااااسه :)
عقب سرنا غنتوت .... صوب شاليهلات نسيبي ... و انتهت الرحلة على خير
والآن مع

التكاليف


الغرفة 1300 درهم


المساج 300


العشى 320


الريوق 130

وان شاء الله ما تكون آخر السيرات
:


وها انا بين احضان كمبيوتري العزيز

8 حـط تـعلـيـق:

غير معرف يقول...

=) ,,

انا اول وحدة ارد ننناااناااا .. الحمدلله انكم استانستوا .. ماعرف وانا اقرا حسيت انك مسافر برع البلاد مش ف دبي ,’
الله يهنيكم ويبعد الغرب عن دبي عشان نحن نستانس فيها :P ,,

خويتك ,’ دزاستر

الفراشة يقول...

بصراحة جميل جدا ،،، عيبني المكان وطااح ف خاطريه

لازم أزوره ^^

ع فكرة دوم أزورالمدونة بس اول مرة اعرف اضيف رد

إضافة الردود معقدة جدا ،،

الله يخليك ،، احجز مساحةللمدونة لين متى تبا تبقى ع المجانية :(

قَـلَمْـ ة رَصـاصْ يقول...

كشششخـة!!
ما أعرف شو أقول بعد >_< هع هع
أنا ألحين ما أفكر شو بكتب
أنا ألحين أفكر كيف بسير هناك
أحلى شي أن الكل يعرف اسمك
شكلهم يعرفون الضيافة على أصولها
بس اسم الفندق شوي غريب
أنا تحريت تقصد غوريلا شي جي
وعقب فهمت أنه شنغريلا

غير معرف يقول...

اخوي ليش كل هالمصاريف على فندق؟؟ مااعرف كيف انطق اسمه..عندي لك راي اتسير مسافي او حياك فعوافي ويانا ماتكلفك ولا حتى خيمة حلات النوم بين سحالي>>يبالي اغير تخصصي واسير سياحة فندقة

ومثل مايقولون فالمجد صيفنامع اهنا احلى

ملاحظةانا مادخلت مدونة من زمان متى غير الديزاين للاخضر ليكون من فازت الجوارح
والسموحه منك
اخوك من راس الخيمة

ramadeah يقول...

ماشاء الله ..الله يهنيكم :)
رحله فلااااااويه << مفرد فله هع
الفندق فظيع ..
يبيله نروح دبي ...من زماااااان مارحنا ..


مطوع انا اقترح تحول مدونتك ع الورد برس بنفس الدومين
افضل بكثييير من قووقل
يطلع لك اعدادات وخيارات كثيييره ومتنوعه وصفحة احصائيات كامله يوميه
كيف يدخلون الزوار مدونتك وكل الروابط اللي يضغطون عليها وتعليقاتك على المدونات الثانيه

رائع جدا وممتع ....

ramadeah يقول...

اخيييرا قدرت اعلق ..

ميوه ثانيه للورد برس
التعليقات مافيها كل هالتعقيييييييييييييييد...>.<

bu saad يقول...

على البركه...اشوف البلوق خافت نوره العاده مواضيع ورى بعض....اثاريك معرس...منك المال ومنها العيال و موفق باذن الله


قبل مده ياي بطبع شي من جهازي لكن الي انطبع مواضيع مدونتك:)
كان صورة سلة فواكه اهداء لقرائك


الفندق يهبل...بصراحه ما يتطوف


BU-SAAD.BLOGSPOT.COM

مستر مطوع يقول...

:: سوري عالتأخير ::




والله يا دزاستر إني ما شفت ولا مواطن .. ولا أي واحد لابس كندورة .أللهم واحد عند الرسبشن وطلع سعودي :)


الفراشة ... دخيلج شو إللي كان معقد في السالفة .. وايدين يقولولي هالكلام ... بس للحين مب فاهم التعقييد ؟ وحياج الله في المدونة واسعدني ردج


قلمة رصاص ....... تراج قاعده تتطنزين على واحد من ارقى سلاسل الفندقية بالعالم :)


اخوي من راس الخيمة ...... مرات الواحد حلو يقرقش مخباه فهالسوالف .. ويشوف الدنيا التافهة وين توديه ... !

ومثل ما قلت .. انا بصراحة افضل البر والرخص وال.. وال...

لكن يبالها تراتيب وعفسه وتعب .. وماعندي خوي .. فجيه
:)

رماديه ... بلوقر للعيـّـازين .. وللآسف أنا منهم خخخ


بوسعد .. معرس شو .. !
انا متزوج من سنتين .. وعندي بتشا اسمه يابر ...:)

يمكن انته قريت الفلاش باك

إرسال تعليق

كـلمـة ئـصـيـرة .. تـمحـي بلاوي كـتـيـرة