27‏/05‏/2008

عيد ميلادي










في مثل هذا اليوم من سنة 1332 ولد المؤرخ العلامة عبد الرحمن بن محمد بن خلدون صاحب اشهر مقدمة في علوم الفلسفة و الأدب








على الأقل .. سويت لي مدونة :)




في مثل هذا اليوم من سنة 1995 قتل نحو 2500 شخص, إثر زلزال ضرب جزيرة "ساخالين" شرق روسيا ( بشرة خير ! )








في مثل هذا اليوم من سنة 1910 توفي العالم "روبرت كوخ" مكتشف البكتريا، وهو ألماني الأصل


ولد عام واكتشف بكتيريا الجمرة الخبيثة، والسل، والكوليرا، وحاز على "جائزة نوبل".


( تؤمنون بانتقال الأرواح :) ... يمكن انا كنت هالإنسان في قديم الزمان .. ممم ... ما اظن ... يمكن كنت كيلوباترا .. خخخ )












وايضاً واهم ما حدث في هذا اليوم على مر العصور .. هو انه








في مثل هذا اليوم من سنة 1984 ولد مستر مطوع ... في مستشفى الواحة " كند" و قد كنت جميلاً مربرباً ابيض اللون .. تقولون ولد دانيماركيه
و حتى يد ّتـي تقول إني ما صحت ... ( الله ياخذ الجذب ! )








::::::::::::




... خلوني " اريوس " بكم .. قليلاً عبر الزمان ... بما صار لي في عيد من" اعياد ميلادي "

في سنة 1994 .. نجحت اخيراً في اقناع ابوي .. باقامة حفلة في يوم ميلادي




ومثل ما تلاحظون .. ان يوم ميلادي يصادف آنتهاء الإمتحانات




فكانت النفسيات فوق والكل مستانس بالفراغ .. متناسين ان الشهايد والفضايح عقب شهر




المهم



طبعاً .. نحن ولا مرة سوينا حفلة عيد ميلاد .. و حتى ولا مرة سرنا حفلة عيد ميلاد .. ولا نعرف شقايل يسونها. بس المهم كيكه وشموع ولمة عرب !





فرحت ويا ابويه سوق المويجعي مخبز النور .... واشتريت هيج الكيكه إللي فخاطريه من يوم انولدت



ما انسى شكلها ... كان لونها ازرق .. ونقط خضر ودواير سود .... ( شو هاللون الخايس )




يونّها .. كيكة جني إللي بعلاء الدين .. خخخخ




" والله إني مب قادر اكتب من الضحك "


:::::


وابويه اشترى وحده ثانية اصغر " احتياطاً " كانت كريما سادا




و نحن راديين .. هيه صح .. اشترينا بعد غرشتين ميرندا من الكبار




" قسم بالله ... اياااااااااام = ) "


:::::



وصلنا البيت .... ولقينا اميـّـه ( ماي مازر ) المسكينه




مب مخليه ... صحن في المطبخ إلا فارشتنه




لا .. وبشكل طولي ... اونه مائدة طعام

...




والله تقول خيمة افطار صائم


=)
... اذكر إني قعدت اصيح ... واصيح .. واقول إلا اريد طاوله ينحط عليها الكيك




احتار ابويه . فيني .. وطلع يدبر وحده .. ( ما اذكر إنه تاخر .. الظاهر سرقها من سكراب .. ! )




::::::



نسيت اخبركم عن الزينه .. :)




لا لا لا




عاد كانت الزينه من صنعي انا عاد


رحت ورى البيت انا واختي و" مجعنا " اي قلعنا


الحبل إللي يعلقون عيله الملابس و كان لونه اخضر



وعقب دورت دفتر ويمعت خواني .. وعطيتهم الوان .. قلت لهم ... كل واحد يلون على هالأوراق




وعقب " خبقت "
اي ثقبت ُ


كل الأوراق من الأعلى وادخلت الحبل بحذر و ووزعت الأوراق بشكل متساوي
( شياني استويت مارثا ستيورت )




!


وهكذا النتهينا من الحبل بعد ان علقناه في زاوية من زوايا البيت




( تقول عرس بتان )


::::::




دخل ابويه وياه عمال شايلين الطاوله الطويله... وبسرعة حولناها إلى مائدة طعام فارهه المنظر

( حاولوا تصدقون يعني )




يعني اميه .. حاطه كيكه عدالها هريس .. وسلطة وشويت رويد
ووصل الضيوف ... عيال خالتي الخمسه وعيال جيرانّـا ( راعية المسامير )
وبرى البيت .. كانوا ربعي من الحارة . شلة الحراميه يتروين حد يدخلهم


لكن هيهات ... طلعت عطيت كل واحد قلاس ميرندا وبس




نذاله

!

:::::::


و بدت مراسيم الحفلة غصباً ... بهجوم الصغار على الكيكه ..... الزرقى ... و هناك .. لاعت الكبود .. واستقلبت البطون .. و دارت العيون من طعم تلك الكيكه .... ( ليش مستغربين .... انتوا شفتوا لونها ! )


اتضاربنا عالكيكه الصغيرة ... و بدى الصياح ... و غضبت الأمهات .. وكل وحده شلت عيالها .. وروّحت بيتا




و ماتم من الحفلة .. إلا هالسم ... و شليتها .. حق .. ربعي إللي بعدهم عند الباب




( ماشي شغل ... إنزين ما دخلوكم .. سيروا لعبوا سو شي ..! )




وعطيتم إياها ... و ما واحوا ( هاي ماعرف تفسيرها ) يطعمونها... إلا في بطونهم




... رديت البيت .. محبطاً من هالحفلة .... و لأني ما استقبلت أي هديه

شفهّـمهم .. بهالعلوم والسوالف والهدايا


.....


وإلى ذلك اليوم .... ما رحت ولا سمعت عن حفلة عيد ميلاد .. إلا واحد فلبيني " نصراني "في ماكدونالدز
= )




عاد نحن مسلمين .. ومالنا خص في هالسوالف



:::::::::::



ممم حزن ..... خلوني اهدي نفسي هالبطاقة في يوم ميلادي







تو مي






13 حـط تـعلـيـق:

الصامــت يقول...

هابي بيرث دي تووو يوووووو ..

كل سنة وانت طيب , وعقبال 123 سنة بس :P

صراحه حفلتكم كانت روووعه خخخخخخ

يالله , في ذيج الايام يعتبر عرس مب حفله ..

مخبز النور فوقتها كان قصر الحلويات

وينافس بيستاش وفواله .. :P

لووووووول , راحت سنة من عمرك

الله يعوضك , عااد جوف شو سويت فهالسنة الي راحت \:

الله يوفقك اخويه مستر مطوع ..

تقبل مروري ^_^

اسمي : قَـلَمْـ ة رَصـاصْ يقول...

يلا كل عام و أنت بخير،،
وكل عام و أنت إلى الله أقرب،،

الصراحة الكيكة مول ما كانت تشجع
ولا بعد رويد و هريس مولية ما يناسبون أجواء الحفلة،،
راحت عليك هههه
أخ عالنذالة بس
يعني ربع الفريج ما تعطيهم سالفة يوم تجوف الأهل!! ،،لا لا كلنا جيXD

عاد بغيت أنبهك
هو مب عيد ميلاد يوم ميلاد!!

اسمي : قَـلَمْـ ة رَصـاصْ يقول...
أزال المؤلف هذا التعليق.
لؤلؤة يقول...

يوم ميلاد
اممممممممم.....يوم نذكر النفس ليش جينا لهاي الدنيا...

حفلتك ضحكتني ،فرج ربي لك كل هم ونكد مال امتحانات مثل اللي عندي...
انزين.....ودي أتخبرك :
منو ام المسامير؟....وليش ما صحت يوم صغير؟ مريض !!!!
وليش عازمين الحريم يوم هي حفلة صغارية!...شو هالكيكة العجيبة!..
يالله ذكرتني بالرويد،مادري متى آخر مرة كلته !!!
وترجمة (ماواحوا)...في الدكشناري ..بس مفهومة للجميع يتراوالي.
الله يرحم والديك يا مطوع....والله الله بالوالد ....:)

خوخه يقول...

ولا تزعل مستر مطوع

عام مضى واقبل عليك عام يديد
يالله عساه عام خير وسعاده عليك

هههههههههه عجيبه الصراحه الكيكه
الحين لو تباها لازم طلبيه خاصه
<<<<< بدينا عياره

يرحم ايام اول يومي بغيت عيدميلاد
سويت مناحه بالبيت لين يابولي كيكه

والحينه خل حد من اخوانيه يقول
عيد ميلاد اول شي اقولهم لا مب زين
يقولون يوم ميلاد وبعدين مايجوووز
<<<<< عقب ما خلصت واستانست على ايامها


يالله ربي يوفقك

مستر مطوع يقول...

الله يبارك فيك يا الصامت ..... مخبز النور الحين .. حتى حق فطاير ما يصلح :)


و بخصوص المحاسبة ....والله امبونها النفسية خربانه علشان .. واتبني ازيدها غم بتذكر احداث السنة هاي :(




قملة ..... الحين بتزعل :) !! .. والله بالغلط كتبتها . .:) خخخ

قلمة رصاص .... يزاج الله خير عالتنبيه ... انا كنت ادري ان واحد بينتبه عالموضوع هذا وبينبه الباجين شراتج فما صلحتها .. ( يآه يا العيار )


لولوة ...... راعية المسامير .. بتعرفينها اذا دخلتي الرابط .. والحيرم هم إللي يابوا اليهال ... و اني ما صحت لأنهم يجذبون كل العيال صاحوا ... وبس :)


خوخة .... هيه الحين مسوي عمري مطوع .. و لأ ما يصير عيب عليكم .. وما يدرون إني انا من ابتدع هالفكرة في عايلتنا .. . :)

HamoOora يقول...

الحفلة كانت جدا عفوية..

(لكن هيهات ... طلعت عطيت كل واحد قلاس ميرندا وبس)

لووول

ننتظر جديدك

يعطيك العافية

بو محمد يقول...

أكيد راعية المسامير هي أهم المدعوين.^^

غير معرف يقول...

كل عام وانته بخير ,, >> مؤخرا ,,

صرااحه ضحكتني السالفة من الخاطر ,,
تسلم اخويه :)
سوري فور بينق لييييت ,, :P

خوويتك: دزاستر

غير معرف يقول...

مطوع و عيد ميلاد؟
الله يعين لو عادي؟ جان سويت بارتي!؟

مستر مطوع يقول...

دزااستر ......... ولوووو مقبولة كل حين :)


غير معرف ....... هذيج الأيام صاة ما نصلي
:)

غير معرف يقول...

كل عــام و انته بصـحه و عافيه و لربك اقــرب ,,

غير معرف يقول...

كل عااام وانت بخير ..


وعقبال ما تكمل سنواتك بطاعة ربك

إرسال تعليق

كـلمـة ئـصـيـرة .. تـمحـي بلاوي كـتـيـرة