28‏/03‏/2008

احراجات 1

وايد مرات تستويلنا مواقف ... محرجه من الخاطر
قدام الأهل - قدام أبوك - قدام الغرباء
وساعتها عاد تتمنى فيها انك تندفن تحت التراب .. أو تختفي
ويوم ما تخلص السالفة .. تتمنى كل من حضرها انه نساها
لكن هيهات
=)
خلصنا الأنترو .. ندخل في المواقف
هالسوالف تقريباً من 4 سنين


:::::::::::::: عيون تحت الفراش ::::::::::::::
البارحه القايله ... (بدينا نخور :) )
اقصد الظهر ... دخلت البيت مستعيل ( لا دعاء دخول البيت ولا سلام ) :)
وسيدا...(يعني مباشرة) عالتلفزيون علشان اشوف برنامج أعذب النشيد ...وكانوا حاطّين
نشيدة هاني مقبل(( الليالي ))
وطبعاً النشيدة شوي رومنسيّية
عاد أنا نسيت عمري وأخذت أنشد و فتحت ذراعيني للسما مثل تايتنك
بس من دون وحده قدامي
يعني كان منظر بايخ
بدرجة فظيعة
المهم ولاّ شوي
وأشوف السرير إللي بالغرفة يتحرّكّّّّ
!!!!!!
وات أز ذات
(جان)..........هالكلمة تأتي بمعنى (فإذا بي )
كم بعلمكم !
أشوف عينان تلمعان من تحت الفراش.....!!!
ياللهول............أنها نظارة ُ أبويا .... (ماي فازر)
وجان .....ينقع من الضحك ويرفع صوته...
أتصدقون من زمان ما سمعته يضحك
وقال: والله خلّفت يا بوحمدان.......(حمدان ماي بق برزر)
عاد أنا انستحيييت على وايهي ... وقعد يونّي أحاول أعدّل المروحة ( البنّكة) وأهندسها
عقب شو
:::::::::::::::الباكستانيين:::::::::::::
مرة من المرّات...كنت فرحان بهدية أبوي لي ( الأكورد الخضرى)...وقاعد أسمع أناشيد ....أعتقد كان المعالم
وكانت نشيدة اجددوا البيعة
وطبعاً النشيدة أولها...هدووووووووء وعقب الربشة ..المهم ....ونا في الشارع...قاعد أتمايل مع النشيدة براسي...ولاّ وتبدا النشيدة
جددوا البيعة ..........من عهد تبوك
وجان أزوّد( التمايل) حبتين .. 3 حبات اربعطعشر حبه .. خمسين حبه المهــــم .....
ونا ناسي الشارع...باللي فيه
هالأناشيد بلوى
وفجأة جان أنتبه للشارع قدامي شاحنة مكشوفة من الخلف,,,, من هايلا إللي تأخذ العمّال للدوام
وكانت ممزورة.؟..(مملؤة)....بالخانات...الباكستانيين
ومبلقين...(جاحظي) عيونهم... صوبي ...وفيهم إللي يضحك وفيهم إللي يأشير ويغمز
وفيهم إللي يوعّي...(يصحّي) ربيعه..ويقوله بص وبص بص
وأنا ماخذني الهوى...هق هق هق
يادالكسوووف.. تقطع ويهي منهم والله جان آخذ الدوّار يمين وشردت عنهم
...كان عرض مجاني لهم...
حشى رقّاصة
......
وهوهو وه وه وه

:::::::: ربيعي الغريب :::::::::
في يوم من الأيام ...كانت هناك محاضرة للشيخ عبد المحسن القاسم إمام الحرم المدني...بعد صلاة المغرب.. في الجامع الكبير في حارتنا
وصلنا على الإقامة......وطبعاً صلاة المغرب كانت سريعة ..فكان كل الموجودين في مرافق المسجد يتراكضون...هذا يركض للحمّام وهذا يصرخ على إللي ورى الباب
وهذاك يشرب ماي ولا على باله... والأخير يلس يدوخ ..يايبينه غصب :)
المهم
ونا مع القوم يا شقرى
فصخت نظارتي خارج الحمام
علشان أتجهّز للوّضوء.وقبل ما أدخل الحمام...لقيت (ربيعي) = واحد من أصدقائي
بس الغريب كان لابس بشت أصفر .... مم غريب... ( اصلاً ها ربيعي عليه حركات ) فـحبيّت اسوّي معاه مقلب
فرحت من خلفه ... ومطّيت = شدّيته بشده وطاح.... و أنقع (أنفجر) ضحك.. شو هالعوافه
نزل بسرعة وأخذ بشته وطالعني...باستنكار.... حسّيت إن السالفة جد...رحت أتوضى
والحمدلله صلّينا...وجلسنا عند المقدم
و لما كان المقدّم يتكلّم ....لبست نظارتي....وانتبه إلا و الشيخ يبتسم لي....ابتسمت له
وبعد يبتسملي.... طول كلمة المقدّم....وعقب لمّا بدا يخطب...رفع بشتح وحطّه على الكرسي...أوووه أووووه والعثرةهذا
نفس البشت
الحين فهمت هذا ربيعي كان الشيخ ......(كنت فاصخ النظارة )وقعدت مستحي منه
ليما خلّصت المحاضرة... وسلمت عليه ويهي ازرق من المستحى ...
ما اظن ان الشيخ يا الأمارات من عقبها خير شر
=)

10 حـط تـعلـيـق:

Humaid يقول...

لوووووووول .. ولا ابوك حركات انا ما اتوقع احد يسويها فيني .. الباكستانية تحس من كثرهم صايرين رادارات عالطريق الله يسلم لو كان مركبين بداخلهم تشيبس يمسكون الارقام .. الحين في السالفة الاخيره كنت تتحسب ربيعك بدل المطوع ..؟ لول لهالدرجه ما تشوف !

غير معرف يقول...

...,

اسميني ضحكت من الخاطر ..
ساعات يوم اقول لربيعاتي اني ارتبش ع الاناشيد يستغربون والله انه في انا شيد اتربش بالذت الحماسية .. فعادي تستوي ف اكبر العايلات بالذات موقفك مع الباكستانيين ..

تسلم اخوي ع الذكرى الحلوة ..

خويتك : دزاستر

لؤلؤة يقول...

يا حليل أبوك...كيف مسك نفسه وهو يشوفك....
ماشاء الله عليك كل هذا يسوي فيك النشيد..الحمد لله والشكر....

مستر مطوع يقول...

هو الظاهر ابوي كان راقد .. و توه وعى وشاف الذرية الصالحه :)

أما الباكستانيين .... مساكين تونّسوا

ramadeah يقول...

هههههههههههههههههههههههههههه

عندي اختبارات وجالسه اضحك
من المواقف ومن الهم
:)

ياشين المواقف المحرجه
تفششششششششششششششششل الواحد

بأنتظار احراجات 2

غير معرف يقول...

يا ضحكت من الخااطر..

الله يسعدك أخوي ^^
ولا تحرمنا هالضحكات
والمواقف الطريفـة ..!

/
\
أَسْمَى..

Um يقول...

هههههههههههههه

نسيتني الهم اللي كان فيني

ربي يسعدك في الدارين

أناشيد هالزمن ربشه .. فما تنلام خخخ

bu saad يقول...

ويح قلبي؟؟
ههههههههههههههههههههههههه

مسكين تكسر الخاطر خخخخخخخخخخخ

عادي خو عندنا و عندك خير....:)

والي يقول وحده فصخت النظاره و باست و لد عمها ضنا منها اخوها.....ككككك

غير معرف يقول...

ههههههههههههه سالفه أبوك والبشت صراحه ههههه يعطيك العافيه لا تعليق

IT_Student

lil.D يقول...

ههههههههه
اخر سالفه ضحكتني صدق لول

والله الواحد يسوي اشياء يتفشل منها >_<

إرسال تعليق

كـلمـة ئـصـيـرة .. تـمحـي بلاوي كـتـيـرة