14‏/05‏/2007

الهندي مب ريـّـال


انا ترى اشتغل في اتصالات ... واركب الشامل في بيوت الناس
وفرضوا علينا نلبس بدلة = يونيفورم
عاد مستر طوع ... ولحيه ... و بنطلون ... و قميص
يعني صدق بتاني
المهم
مره دخلت بيت ... فاستقبلتنا الأم وقالت دخلوا ركبوا الشامل فغرفة الريم
!
يونـّي اعرف الريم انا
فطبعاً الام اشرّت بإيدها صوب الغرفة
ونحن رحنا صوب الغرفة
فحيائي منعني من دخول الغرفة منيه و الدرب
فدقيت الباب = طرقته
ولاّ الأم تصرخ من وراي على منوه ادق البااااااااب ؟
دش داخل
ففتحت الباب
والا الأميره النائمة توها واعيه و من دوون ما تتكلم اشرت عالابتوب
فقلت ما شاء الله محترمة ما ترمس رياييل
وسارت الحمام
فبدينا شغلنا .. و جان تطلع البنت وتصرخ علينا صرخة هدت البيت
(( فإذا هم من الأجداث إلى ربهم ينسلون ))
ما اريده فرفة النوم ... حطوا الوايرلس في الصالة
....
ربيعي إللي وياي هندي
طلع يركب خارج البيت
وانا ابرمج المودم
فالبنت طلعتلي بالمصلاه و عطتني اللابتوب
وتقربت منـّي لدرجة أنه ..... بلاش اتكلم
المهم
انا ما اتذكر شو إللي قلته إللي عرفت البنت من خلاله أني مواطن
وما تشوف عينك إلا النور
المسكينة طرّت زوالي البيت والفرش من ركضها صوب غرفتها
فسمعتها تكلم امها بالموبايل
اميه هذيلا مواطنين ؟
25
ثانية
والأم دخلت علينا بسرعة تتفقد بنتها المسكينة لتنقذها من براثين المواطنين
الأم ما تكلمت
فجلسنا في هدوء مخيف
افكر في حال مجتمعنا كيف يشوفون الهندي أقل من أنه رجل
later on
بعد ما خلصنا ..... طلعت البنت تشيك عالشامل بالحجاب والنقاب الكامل
؟؟؟
إللي قاهرني إن الناس يقولون إن أنا الهندي و ربيعي سوري
:)
مستر مطوع

4 حـط تـعلـيـق:

moayad يقول...

ذكرتني بمسرحية لغانم السليطي (ما أذكر أسمها) يمثل فيها دور واحد كان عايش في الهند طول حياته لأن أبوه القطري لما تزوج أمه (الهندية) خلاه معاها هناك و محد درى عنه الا لما مات الأبو

أخوانه عرفوا بالسالفة و رجعوه قطر بعد ما طلعوله جواز قطري


المهم..

اهو لما رجع قام بدى يتعرف على أهله و منهم بنت عمه اللي طيحت معاه الميانه على طول وهي ما تعرف منو اهوه ... فلما أبوها قالها هذا ولد عمج قامت تركض مثل صاحبتك :) .. فسأل عمه شفيها انحاشت؟ كانت قاعده تسولف معاي عادي..

فقاله عمه..

إييه.. كان عبالها إنك هندي !!!

مستر مطوع يقول...

هيه والله صدقك

بالضبط اذكر المسرحية ويـّا العقال إللي كان يبى يلبسه
:)

والله هالحالة عجيبه غريبه

المشكله أن البنت ... صدق ملتزمة

بس هالفكرة في بالها من الصغر



::::


وقراتسي عالكومنت يا مؤيد

noodlz يقول...

وبالنقـــاب!!!

والله دنيــا!!

ما يتحجبون و يعقون الميانة ويا الهندي,,شي مالوف..

لكن وجود الهندي في البيت مثل عدمه
شي يديد!!

لاحول ولا قوة إلا بالله

غير معرف يقول...

مستر مطوع ..للأسف أغلب البنات ما تعرف الطوع إلا إذا جافت الكندورة البيضا .. و اما انا فـ هالشذوذ اجوفه كل يوم في الجامعة .. و انا ما قصد الشيلة بس لكن حتى العباه .. يقولك يبن يلعبن كرة سلة ..!
و من يجوفن هاك المواطن القادمـ من بعيد .. بدن يتغطن لدرجت انك ما تعرفهن .. الله يستر علينا بس =[
وتري انا مش بس اتشكا .. يالستلهن يلسه هههه ..

إرسال تعليق

كـلمـة ئـصـيـرة .. تـمحـي بلاوي كـتـيـرة